Txuri Urdinek ez du hutsik egiten
Txuri Urdineko nesken partida bat.Txuri Urdin 
Denboraldia hasi denetik, Txuri Urdinek ez du partidarik galdu nesken ligan. Atzo, orain artekoak baino partida estuagoa jokatu zuen Majadahondaren izotz pistan, baina garaipena lortu zuten (3-6). Hori dela eta, lidergoa sendotu dute hirutik hiru neurketa irabazita.
Futbolean, Realak laugarren garaipena jarraian eskuratu zuen larunbatean, Zubietan. Betis hartu zuten mendean, eta lau gol egin zizkieten (4-0). Horietatik bi Amaiur Sarriegi aurrelari donostiarrak egin zituen. Beste biak Elene Guridik eta Manuela Vanegasek egin zituzten. Sailkapeneko bosgarren postuan daude 12 punturekin.
Eskubaloian, Bera Berak estu eta larri, baina gainditu zuen Europako Ligako lehen kanporaketa. Gaskan jokaturiko itzulerakoan, berdindu egin zuten Benficaren aurka (32-32), eta, beraz, baliagarria izan zen joanean lorturiko bi goleko errenta. Horrela, hurrengo kanporaketa jokatuko dute donostiarrek, QR3 deritzona. Poloniako Lublinen izango dute aurrez aurre, eta joanekoa han jokatuko dute azaroko bigarren asteburuan.
Saskibaloian, Gipuzkoa Basketek denboraldiko lehen garaipena eskuratu zuen Illunben. Gainera, garrantzitsua. Izan ere, Menorca hartu zuten mendean (60-57). Konfiantza hartzeko baliagarria izango da, ziurrenik. Aldiz, Ibaeta Basketek ligako bolada txarrari jarraipena eman zion. Kanaria Handiaren pistan alde nabarmenarekin galdu zuten (70-58). Europan erakutsitako maila ona ez zuten berresterik izan ligan.
Belar hockeyan, Reala garaipenaren bidera itzuli zen Santanderren, Sardinerori irabazita (0-1). Etxetik kanpo puntu onak lortzen ari dira txuri-urdinak, eta aipaturiko lorpenak balio handia dauka.
EMAITZAK
Izotz hockeya
Emakumezkoen liga, 4. jardunaldia
- Majadahonda 3 – Txuri Urdin 6
Futbola
Emakumezkoen liga, 6. jardunaldia
- Reala 4 – Betis 0
Eskubaloia
Europako Liga QR2, itzulerakoa
- Bera Bera 32 – Benfica 32
Saskibaloia
Emakumezkoen liga, 2. jardunaldia
- Kanaria Handia 70 – Ibaeta Basket 58
Gizonezkoen bigarren mailako liga, 3. jardunaldia
- Gipuzkoa Basket 60 – Menorca 57
Belar hockeya
Emakumezkoen liga, 5. jardunaldia
- Sardinero 0 – Reala 1
