Garaipenak gehiago balio du
Bera Berak Atletico Guardes liderraren pistan irabazi du gol bakarreko aldearekin (26-27).
Bera Bera eta Atletico Guardes taldeen arteko partida.Bera Bera 
Estua, bizia eta sufritua. Horrelakoa izan zen Bera Berak Atletico Guardesen kontra larunbatean lorturiko garaipen garrantzitsua. Donostiako taldeak liderraren pistan jokatu zuen, eta bost goleko errenta politarekin partida bideratua zuela sinetsi ondoren, gol bakarreko aldearekin lortu zuten irabaztea (26-27). Garaipenari esker, Bera Bera sailkapeneko laugarren tokian dago orain, eta hurbilago ditu ligako orain arteko talde erregularrenak: Malaga, Atletico Guardes eta Porriño.
Futbolean, asteburu nahiko ona izan da Realarentzat. Mutilek etxetik kanpoko bolada onari eutsi zioten atzo, Sevillan. Argi geratu da txuri-urdinak hobeto moldatzen direla, momentuz, Anoetatik urrun. Neurketa serioa eta ona jokatuta irabazi zioten Sevillari (0-2). Take Kubok gol ederra egin zuen, eta Mikel Oiartzabal kapitainak penalti bidez egin zuen bigarrena. Sailkapeneko zuloa urruntzea lortu dute. Neskek, berriz, puntu ona eskuratu zuten Zubietan Madrilen aurka, nahiz eta gehiago merezi izan (2-2). Dena dela, markagailuan atzetik ibilita, berdintzea ontzat hartu behar da. Nerea Eizagirrek eta Sanni Franssik egin zituzten txuri-urdinen golak.
Saskibaloian, Gipuzkoa Basketek huts egin zuen Illunben kategoriako talde indartsu baten aurka. Obradoiro galiziarren aurka ondo aritu arren, bi taldeen arteko aldea ikusi ahal izan zen (77-86).
Azkenik, izotz hockeyan, denboraldiko lehen porrota jasan zuten Txuri Urdineko neskek. Bostetik bost partida irabazi ostean, seigarrenean huts egin zuten. Anoetako izotz jauregian izan zen, eta Majadahondaren aurka (1-5). Horrela ere, sailkapeneko lehen postuan jarraitzen dute. Txuri Urdineko mutilek, berriz, astindua jaso zuten Anoetako izotz jauregian. Puigcerdaren kontra nabarmen galdu zuten (1-10).
EMAITZAK
Eskubaloia
Emakumezkoen liga, 7. jardunaldia
- Atletico Guardes 26 — Bera Bera 27
Futbola
Gizonezkoen liga, 12, jardunaldia
- Sevilla 0 — Reala 2
Emakumezkoen liga, 8. jardunaldia
- Reala 2 — Madril 2
Saskibaloia
Gizonezkoen bigarren mailako liga, 6. jardunaldia
- Gipuzkoa Basket 77 — Obradoiro 86
Izotz hockeya
Emakumezkoen liga, 7. jardunaldia
- Txuri Urdin 1 — Majadahonda 5
Gizonezkoen liga, 16. jardunaldia
- Txuri Urdin 1 — Puigcerda 10
