Derbia baino gehiago dute jokoan
Reala sasoi puntu onean iritsi da ligako 10. jardunaldira. Baita Athletic ere.
Realaren eta Athleticen arteko euskal derbia Anoetan, pasa den denboraldian. 
Euskal derbi lehiatua espero da igandean, Anoeta futbol zelaian (18:00). Sailkapeneko goiko postuetan daude Reala eta Athletic. Txuri-urdinak laugarren tokian daude 16 punturekin, eta zuri-gorriak atzetik dituzte 14 punturekin. Derbia Realak irabaziko balu bost puntura utziko luke Athletic, baina beraiek gailentzen badira, sailkapenean aurretik jarriko dira. Pasa den sasoian, zuri-gorriek irabazi zuten Anoetan Nahikariren gol bati esker. Ez dadila errepikatu.
Eskubaloian, Bera Berak Europa ligako multzoen ligaxkara iristeko azken ahalegina egin beharko du, etxean, zaleen aurrean. Polonian Lublinen aurka galdu ostean, lau goleko desabantaila dute donostiarrek. Helburua betetzeko, markagailu hori irauli beharko dute igandean, Gaska kiroldegian (12:00). Ez da batere erraza izango, baina ez da ezinezkoa. Zaleen berotasunarekin dena da posible.
Izotz hockeyan, Txuri Urdineko neskek denboraldiko porrot bakarra atzean uzteko aukera izango dute bihar, Milenio Panthersen Logroñoko izotz pistan (14:25). Lidergoa mantendu eta sentsazio onak berreskuratzea ezinbestekoa izango da.
Belar hockeyan, Realak berdinketa baino zertxobait gehiago eskuratu nahi du Terrassara egindako bigarren bisitan. Izan ere, hiriko beste taldearen aurka jokatu zuten aurreko jardunaldian. Horretarako, Terrassa gainditu beharko dute etzi (13:00).
Saskibaloian, Gipuzkoa Basketek garaipenaren bidera itzuli nahi du. Burgosen jasandako astindua ahaztu, eta irabazteko premia dute. Fuenlabrada izango dute aurrez aurre etzi, Illunben (18:00).
PARTIDAK
Futbola
Emakumezkoen liga, 10. jardunaldia
- Reala – Athletic (etzi, igandea, 18:00)
Eskubaloia
Europa ligako QR3 kanporaketa, itzulerakoa
- Bera Bera – Lublin (etzi, igandea, 12:00)
Izotz hockeya
Emakumezkoen liga, 8. jardunaldia
- Milenio Panthers – Txuri Urdin (bihar, larunbata, 14:25)
Belar hockeya
Emakumezkoen ohorezko maila, 9. jardunaldia
- Terrassa – Reala (etzi, igandea, 13:00)
Saskibaloia
Gizonezkoen bigarren mailako liga, 8. jardunaldia
- Gipuzkoa Basket – Fuenlabrada (etzi, igandea, 18:00)
