Txuri Urdineko neskek lidergoa dute jokoan
Txuri Urdin taldeko neskak, Milenio Panthersi irabazi ostean.Txuri Urdin 
Liderrak dira, baina izandako porrot bakarrak sailkapena baldintzatu zuen. Horrela, Txuri Urdin hockey taldeko neskek Puigcerdari irabazi nahi diote etzi, haien izotz pistan (12:00). Garaipenaren bidera itzuli ziren Logroñon, nola gainera, Milenio Panthersi irabazita (4-15). Logistika arazoak tarteko, gai izan ziren entrenamenduetan landurikoa neurketan islatzeko. Irabaztea dute helburu lidergoari eusteko. Majadahonda eta Puigcerda bera dituzte atzetik. Txuri Urdineko mutilek, berriz, bihar jokatuko dute Anoetako izotz pistan Majadahondaren kontra (21:00). Sailkapenean aurretik dituzte, eta aukera ona da haiengana hurbiltzeko.
Belar hockeyan, Realak partida garrantzitsua jokatuko du etzi, Zubietan (12:00). Club de Campo talde madrildarraren bisita izango dute. Liderrak dira partida guztiak irabazita, bat izan ezik, berdindu zutena. Horiek horrela, norgehiagoka zaila izatea aurreikusten da, nahiz eta bisitariek beti gaizki pasatzen duten Donostian. Txuri-urdinak sailkapeneko seigarren postuan daude, eta gora begira jarraitu nahi dute.
Futbolean, Realeko bi taldeek izango dute ligako neurketa. Neskek Real Madril hartuko dute Zubietan etzi, 14:00ean. Athleticen kontrako euskal derbia irabazita, sailkapeneko laugarren tokian egonkortu dira, eta mantentzeko, gutxienez, punturen bat bildu beharko dute. Aurretik dituzten hiru taldeetako bat da Real Madril, eta ikaragarria litzateke haiek ere mendean hartzea. Aldiz, mutilek euskal derbia jokatuko dute etzi San Mamesen, 21:00etan. Neskek lorturikoa berdintzen saiatuko dira, baina arerioaren etxe zailean.
Saskibaloian, Ibaeta Basket azken bi garaipenei jarraipena ematen saiatuko da bihar, Gaska kiroldegian (20:45). Cadi La Seu izango dute aurrez aurre, eta beste aukera on bat da ligan ere erregulartasuna lortzeko, eta bide batez, denboraldiko hirugarren garaipena eskuratzeko.
PARTIDAK
Izotz hockeya
Gizonezkoen liga, 9. jardunaldia
- Txuri Urdin – Majadahonda (bihar, larunbata, 21:00)
Emakumezkoen liga, 9. jardunaldia
- Puigcerda – Txuri Urdin (etzi, igandea, 14:00)
Belar hockeya
Emakumezkoen ohorezko maila, 10. jardunaldia
- Reala – Club de Campo (etzi, igandea, 12:00)
Futbola
Emakumezkoen liga, 11. jardunaldia
- Reala – Real Madril (etzi, igandea, 14:00)
Gizonezkoen liga, 14. jardunaldia
- Athletic – Reala (etzi, igandea, 21:00)
Saskibaloia
Emakumezkoen liga, 8. jardunaldia
- Ibaeta Basket – Cadi La Seu (bihar, larunbata, 20:45)
