Loiolako kuartelen akordioa berriz negoziatzeko «une egokia» dela uste du EH Bilduk
Lursailean aurreikusitako etxebizitza publikoen kopurua handitzea eta Eusko Jaurlaritza inplikatzea proposatu du udal taldeak.
Juan Karlos Izagirre eta Ricardo Burutaran, udaletxeko prentsa aretoan.EH Bildu 
Etxebizitzarena “lehen mailako arazoa” dela berretsi du EH Bilduk, eta premiazkoa dela “anbizio handiko politika publikoak” egitea. Horren harian, agerraldia egin dute udaletxean Juan Karlos Izagirre EH Bilduko bozeramaileak eta Ricardo Burutaran zinegotziak. “Borondate politikoa baldin badago, badira aplika daitezkeen neurriak”, nabarmendu dute.
Udal taldearen ustez, arazoaren konponbidea “sustapen berrien eraikuntzatik harago” doa, “etxebizitza hutsa merkatura ateraz, kalifikazio formularekin eraikitako etxebizitzan esku hartuz edo beste leku batzuetan jada ematen diren beste ekimen batzuk gauzatuz; cohousing-a kasu”.
Loiolako kuartelen lursaileko etxebizitza proiektua da hiriak eskuartean duen garrantzitsuena. Udalak eta Espainiako Defentsa Ministerioak egindako akordioa berriz negoziatzeko “une egokia” dela adierazi du Izagirrek: “Hasieratik adierazi dugun moduan, akordioa Defentsa Ministerioarentzat onuragarria da, baina ez hainbeste Donostiarentzat: hitzartutako prezioagatik (74 milioi euro), babes publikoki etxebizitzaren gutxieneko ehunekoagatik eta hitzartutako beste baldintza batzuengatik. Hala nola, prezioaren igoeragatik, aurreikusitakoa baino gehiago eraikitzen bada, baina murrizketarik gabe, gutxiago eraikitzen bada edo ezer eraikitzen ez bada”.
Bestalde, bozeramaileak gogoratu du, Espainiako Gobernuaren eta Eusko Jaurlaritzaren diskurtsoek erakundeen artean elkarlanean aritzeko beharra partekatzen dutela, “ahalik eta etxebizitza publiko gehien lortzeko lurzoru publikoak eskainiz”. Era berean, aipatu du akordioa aldi baterako etenda dagoela, Espainiako Kostaldeko zuzendaritzak ebazten duen arte lursail horietan aplikatu beharreko mugatze lerroa. Izan ere, zuzendaritzak dio Urumea ibaiaren eta eraiki nahi diren etxebizitzen arteko distantzia ehun metroa izan behar dela. Udalak hogei metrokoa izatea nahi du.
“Akordioa berriz negoziatzeko eta Eusko Jaurlaritzaren inplikazio aktiboa eskatzeko helburuak, operazioa merkatzea eta babestutako etxebizitza publikoen ehunekoa ahalik eta handiena izatea ahalbidetuko luke”, nabarmendu du Izagirrek. “Ordea, alboan, Martuteneko espetxeko lurzorua Eusko Jaurlaritzari doan lagatzea planteatu da, etxebizitza publikoen ehuneko askoz handiagoekin, eta hori EH Bilduk 2011-15eko legegintzaldian eremu horretarako egin zuen plangintzari esker. Zergatik ez planteatu Loiolako kuarteletan?”, gaineratu du.
