Agur Arriolako aterpetxeari, epaileak berretsi du legez kanpokoa zela lizentzia
Basquepackers Urban Hostel aterpetxea, Arriola pasealekuan. (Argazkia: Booking) 
Bi urte eta erdiko borrokaren ostean, arrazoia eman die epaile batek bizilagunei. Antiguako Arriola pasealekuko Basquepackers Urban Hostelaren lizentziaren aurkako borroka abiatu zuten bizilagunek, eta Donostiako Udalak onartu behar izan zuen, emandako lizentzia legez kanpokoa zela. Enpresak epaitegietara jo zuen, baina orain helegitea ukatu du epaile batek eta lizentzia legez kanpokoa dela baieztatu du.
2023an, udalak bertan behera utzi zuen lizentzia, Arriola pasealekuko 15., 17., 19. eta 21. zenbakietako bizilagunek hainbat kexa eta erreklamazio aurkeztu ondoren, baita obra baimena auzitegietara eraman ondoren ere. Geroago, aterpetxearen sustatzaileek, Liderko enpresak, bere garaian aurkeztu zituzten planoak okerrak zirela egiaztatu zuten, eta udalak erabaki zuen bizilagunen aurka auzitan ez sartzea, eta erabaki judizialaren zain gelditzea.
Udalak agindutako neurketa berri batek adierazi zuen sustatzaileen planoetan jasotako datuak ez datozela bat errealitatearekin, lokala beheko solairuan dagoela pentsatzeko behar den perimetroaren %60ra iristen ez delako; beraz, ezin izango litzateke ostatu hartu. Izan ere, ostatuei beheko solairuan egoteko baldintza ezartzen die Plan Orokorrak.
