Urumeako Mendiak Bizirik herri ekimena aurkeztuko dute aste honetan Donostian
'Vidas irrenovables' dokumentalaren emanaldia izango da bihar eta ostegunean egitasmoaren aurkezpena.
Joan den otsailaren 5ean trantsizio energetikoaren egungo eredua eztabaidan jartzeko asmoz Okendo Kultur Etxean jende asko bildu zuen mahai ingurua egin ondoren, Donostian bi ekintza informatibo antolatu dira datozen egunetarako zentral eolikoen eta energia berriztagarrien makroproiektuen auziaren inguruan.
Otsailak 25 asteartean, arratsaldeko 19:15ean, Vidas irrenovables dokumentalaren proiekzioa eta filmaren zuzendari Franciso J. Vaquerorekin solasaldia egingo dute Groseko Trueba zinema aretoan. Dokumentalak energia berriztagarrien Espainiako industriaren hedapenak ekosistemak, ekonomiak eta landa eremuko gizarteak nola suntsitzen ari den erakusten du. Era berean, mehatxu horren aurka hainbat lurraldetan mobilizatu diren kolektiboen eta pertsonen esperientziak jasotzen ditu. Sarrera doan zango da eta jarduera hau Groseko Hondarpe Auzo Elkarteak antolatu du.
Otsailak 27 ostegunean, arratsaldeko 19:00etan, Arano, Goizueta eta Hernaniko bizilagun taldeek eratu berri duten Urumeako Mendiak Bizirik herri ekimenaren aurkezpena egingo da Okendo Kultur Etxean. Solasaldi honetan, Urumeako mendietan Repsol eta Endesa enpresek bultzatzen dituzten makroproiektu eolikoei buruz informatuko dute. Repsolek sustatzen duen egitasmoa egun Euskal Herrian planteatzen den mota horretako azpiegiturarik handiena da.
“Erreka Parke Eolikoa” deitu duten makroproiektu horrek kalteturiko eremuan prospekzio arkeologikoak egitekoak direla eta joan den urtarrilaren 30ean Nafarroako Gobernuak Aranoko Udalari bidalitako txostenaren arabera, Adarra-Mandoegi mendilerroaren inguruetan neurri handiko 15 aerosorgailu jartzea eta Urnietako Besabitik abiatuta 27’54 kilometrotako sarbidea (6 metroko zabalerarekin) eraikitzea planteatzen da Repsolen proiektuan. Horri gehitu behar zaio energia ateratzeko 21’063 kilometroko luzera eta 68 dorre izango lukeen ebakuazio-linea bat eraikitzea aurreikusten dela egitasmoan, Arano, Hernani, Urnieta, Astigarraga Errenteria eta Oiartzungo udalerriak zeharkatuz, Arkaleko azpiestazio elektrikoan banaketa sare orokorrarekin konektatzeko.
Guztiarekin, bistan dago proiektu honek kalte larriak eragiten dituela natura eta giza ingurumenean, hain zuzen ere lurraldeari eraso egiten dioten eta energiaren kudeaketa lokalagoa eta komunitarioa bultzatzearekin bateraezinak diren makroproiektuen ereduaren adibide argi bat delarik.
Elkarlanean antolatu dute aurkezpen hau Satorralaia, Eguzki, Haritzalde eta Ekologistak Martxan elkarteek.
