LABeko bi kide epaitu dituzte, adinekoen egoitzetako borrokaldian errepide bat mozteagatik
Gaur LABeko bi kide epaitu dituzte Donostian, 2022an, adinekoen egoitzetako hitzarmenaren testuinguruan, errepide bat mozteagatik. LABek, bi kide horiei bere elkartasuna helarazteaz gain, poliziak jarritako salaketa gaitzetsi du: “Langileon lan eta bizi baldintzak hobetzeko LABen ekintza sindikala kriminalizatu nahi izan dute beste behin”, salatu du sindikatuak.
“Pribatizatutako zaintza zerbitzuetako langileok aspalditik gure lan eta bizi eskubideen defentsan borrokarako prest gaudela aldarrikatu dugu. Asko izan dira borroka sindikalaren bitartez lortutako garaipenak, baina askotan nekeza egiten zaigu aurrerapausoak lortzea”. Adierazi dutenez, Gipuzkoako Foru Aldundiak “etengabe egin die entzungor adinduen egoitzetako langileen behar eta aldarrikapene. Patronalek negozioa egiten jarraitzen dute gure lan indarrarekin, adinekoen zaintza duinari ez diote erreparatzen”.
Honela, LABek Gipuzkoako Aldundiak “zaintza zerbitzuak pribatizatzeko duen estrategia” salatu du eta borrokan jarraituko dutela adierazi du: “Errepresio sindikalaren aurrean, baina, ez dugu atzerapausorik egingo ekintza sindikalean”.
