Hezkuntza Sailak Amassorrain ikastolako jangela zerbitzua bermatzeko eskatu du guraso elkarteak
Añorgako Amassorrain ikastola.Beñat Parra 
Añorgako Amassorrain ikastolako Gorgain guraso elkarteak ohar bat plazaratu du, eskolako jantokian gertatzen ari den egoera baten berri emateko. Eusko Jaurlaritzako Hezkuntza Sailak ez ditu bere kontratupekoak diren hainbat sukaldariren bajak ordezkatu, eta, ondorioz, garraiatutako enpresa batek ekarritako janaria eskainiko diete.
“Aurreko ostegunetik, ikastolako sukalde zerbitzuan izan diren bajak direla eta, jangela zerbitzua behar bezala eskaintzeko zailtasunak sortu dira. Egoera honek gure seme-alaben elikadura eta ongizatea arriskuan jar dezakeela uste dugu, eta horregatik, berehalako konponbidea eskatzen dugu”, ohartarazi du Gorgainek.
Sukaldean ematen ari den egoerari erantzun egokia emateko, Gipuzkoako Hezkuntza Lurraldeko Jantoki Arduradunari eskaera bat luzatu diote: “Hezkuntzak alde bakarrez hartu duen neurriaren arabera, jangela zerbitzua kanpoko enpresa batek prestatutako janaria ekarriz bermatuko dela erabaki da. Hala ere, gure iritziz, hau ez da kalitatezko konponbide egokia, eta irtenbide hau epe motzean baino ez dela onargarria azpimarratu nahi dugu. Gure seme-alaben elikadura osasuntsua eta kalitatezko zerbitzua bermatzeko, beharrezkoa ikusten dugu sukaldeko bajak lehenbailehen ordezkatzea, eta bertako sukaldearen funtzionamendua ahalik eta azkarren berreskuratzea”.
Hori dela eta, Hezkuntza Sailari neurri egokiak hartzeko eskatu diote, “sukaldeko langile faltari irtenbide egokia emateko, eta gure seme-alaben jangela zerbitzua berriro ere kalitatezko eta bertako sukaldarien bidez bermatzeko”.
