Donostiak 189.866 biztanle ditu
Historian izan duen populazio handiena da, 2024an 772 biztanle gehituta; hazkundea jatorri atzerritakoei esker izan da.
Eneko Goia alkatea demografia datuei buruko agerraldian.Donostiako Udala Donostiako demografia datuen berri eman du Eneko Goia alkateak, eta biztanle kopurua, beste behin, inoizko handiena da: 2024ko abenduaren 31n 189.866 lagun erroldatuta zeuden Donostian, aurreko urtean baino %0,4 gehiago, 772 biztanle berrirekin. Pandemia urtea salbu, azken urteetako goranzko joera “ez oso azkarrari” eutsi dio, bereziki, migrazioaren eraginez,”ez hemen jaiotako umeei esker”. Alegia, “belaunaldi erreleboa” atzerritik datozenen eskutik dator. Joera nagusiak ere bere horretan mantendu direla azaldu du alkateak, datuak xehatzeri ekin aurretik.
Donostiarren erdia baino gehiago, %52,6, emakumezkoak dira, eta hortaz, %47,4, gizonezkoak. Adin tarte guztietan gehiago dira eta gainera luzeago bizi dira. Zehatzago, 65 urtetik gorako biztanleen %58,6 emakumezkoak dira, %66 80 urtetik gorakoei dagokienean.
Gero eta zaharrago
Batez besteko adina, 47 urtean mantendu da, gizonezkoen artean pixka bat baxuagoa da: 45 urte; eta emakumezkoen artean, aldiz, pixka bat altuagoa: 49 urte. Hala ere, populazioa gero eta zaharragoa da. Batetik, jaiotze tasa txikiagatik, eta bestetik, zahartze indizea handitzen doalako.
Jaiotze-tasak oso txikia izaten jarraitzen du, 5,66koa; urtebete lehenagokoa baino pixka bat txikiagoa, 5,69 zen. 2024an 1.052 haur jaio dira hirian (2023an 1.079) eta 2.045 pertsona hil dira (2023an 2.020). Hortaz, saldo begetatiboa, jaiotza kopuruari heriotzak kenduta lortzen dena, -993 pertsonakoa da. Alkateak zehaztu duenez,”jaiotze tasak oso behean jarraitzen du, eta heriotzek, 2023ko parean. Hazkuntza ez da jaiotzengatik, hirira jendea datorrelako baizik”.
Zahartze-indizeari dagokionez, 2,19koa da, 2023an baino 8,5 puntu gehiago. Ondorioz, hirian 65 urtetik gorako 2,19 pertsona daude 15 urteko pertsona bakoitzeko. Gros eta Erdialdea dira zahartze-indize handiena dutenak, 65 urtetik gorako 3,28 eta 3,13 pertsona daude 15 urteko pertsona bakoitzeko, hurrenez hurren. Aldiz, Loiola eta Añorga dira auzo gazteenak, eta 65 urtetik gorako 1,21 eta 1,32 pertsona bizi dira 15 urteko pertsona bakoitzeko.
Ehunekoei erreparatuta, donostiarren %26,15ak 65 urte baino gehiago dute, %8k 80 urte baino gehiago, eta 118 pertsonak 100 urte baino gehiago dituzte. 2024ko abenduaren 31n hiriko pertsona helduenak 113 urte zituen.
Kolonbiarren ugaritzea
Donostian bizi diren jatorri atzerritarreko pertsonen kopurua hazi egin da eta hirian erroldatutakoen %10,6 dira. Azken urtean, 859 atzerritar gehiago etorri dira hirira bizitzera, eta guztira, 20.167 dira, 10.203 gizonezko eta 9.964 emakumezko.
Hondurasek jarraitzen du atzerritar kopuru handiena izaten (2.425 biztanle). Jarraian Kolonbia (1.942), Nikaragua (1.828), Maroko (1.490) eta Italia (1.089) daude. Bigarren postuan aldaketa egon da, eta Kolonbiak Nikaraguari aurre hartu dio, eta 2024an gehien hazi den herrialdea izan da (+184). “Eboluzio baten jarraipena da” iaz marokoarrak gainditu baitzituzten kolonbiarrek. Marokok ere hazkunde handia izan du (+144), eta Aljeria (+125), Peru (+77) eta Estatu Batuak (+66) izan dira jarraian hirian gehien hazi diren herrialdeak.
Era berean, beste herrialde batetan jaiotako biztanle kopurua %6,45 hazi da, eta 2023an baino 1.821 pertsona gehiago bizi dira hirian. Guztira, beste herrialde batetan jaiotako 29.875 pertsona bizi dira, eta kopuru honek azken urteetako hazkundeari eutsi egiten dio. “Aurreikuspena da hala jarraituko duela. Horrek esan nahi du gure hiriaren izaeran aldaketa nabarmena gertatzen ari dela, iraganean ezezaguna zena”.
Aldiz, Espainian jaiotako pertsona kopurua gutxitu da, eta 2023an 160.962 biztanle izatetik 159.913 izatera pasatu dira. Hortaz, ondorioztatu daiteke, atzerritar kopuruaren zein beste herrialde batetan jaiotako biztanle kopuruaren hazkundea dela biztanleria pixka handitu izanaren arrazoia.
Argazkia osatuta, alkateak berretsi du joerak mantentzen direla eta hala jarraitzea espero dutela. 65 urtetik gorakoek ugaritzen jarraitzen dute, eta erretiro adinean daudenetako asko “klase pasibo” bilakatzen dira, beraz, lan merkatura gehitzen direnak atzerritarrak dira. 2030erako 65 urtetik gorakoak %30 izatea espero dute, beraz, guk ematen ez dugunekin beteko da, “hiriak aukerak eskaintzen ditu, jarduera ekonomikoa du, beraz, fenomeno logikoa da”.
Auzoen bilakaera
Auzoetako datuei erreparatuta, alde handirik ez da atal honetan. Amara Berrik auzo populatuena izaten jarraitzen du, 30.244 biztanlerekin (biztanleria osoaren %15,9), jarraian Erdialdea (Parte Zaharra barne), 22.517, eta Altza, 20.612. Hiru auzo horiei Gros gehituta, 17.831, populazio osoaren ia erdia dute: %48. Era berean, txikienak ere bere horretan mantendu dira. Zubieta da biztanle gutxien dituen auzoa, 317; ondoren, Igeldo (1.125) eta Miramon-Zorroaga (2.475) daude.
2024an gehien hazi den auzoa Loiola izan da, +295, eta ondoren, Erdialdea, +255, Intxaurrondo, +245 eta Altza +132, eta aldiz, biztanleak galdu dituztenen artean, Grosek, 109, Antiguak, 80, Ibaetak 46 eta Ategorrieta-Uliak, 23.
Alkateak azaldu duenez, kopuru aldaketa oso lotuta dago auzoen batez besteko adinarekin. Gazteagoak diren auzoetan joera biztanleak gehitzekoa da eta zaharragoak direnetan, galtzekoa. Ondorioz, Loiola izan da azken urteetan gehien hazi dena eta hala jarraituko du hirigintza garapen gehienak bertan egingo direlako, Lorategi Hiria eta Txomin Enea II, kasu. Erdialdek ere auzokideak gehitzen jarraitzen du, San Bartolomeko promozio berriagatik.
