Donostiako suhiltzaileek bi eguneko itxialdia abiatu dute
Suhiltzaileen protesta udal batzar aretoan.LAB 
Hainbat hilabete daramate Donostiako Suhiltzaileek borrokaldian, eta gaur, 48 orduko itxialdia abiatu dute, suhiltzaileen parkean, Garberan, “iritzi publikoaren eta herritarren aurrean Udal Gobernuaren pasibotasun-egoera salatzeko”.
Azaldu dutenez, SPEISen Negoziazio Mahai Sektoriala aktibatu zenetik, “kolektiboaren lan baldintzei buruz negoziatzeko”, langileen batzordeak plantilla handitzeko beharra adierazi zuen egindako bi bileretan, dokumentu bat osatuz.
Bigarren eta azken bileraren ondoren, martxoaren 5ean, berriro gogorarazi zitzaien idatziz Ogasuneko eta Suhiltzaileetako zinegotzi ordezkariei mobilizazio berriak hasi zirela, “ez baitzegoen plantilla handitzeko beharrari erantzuteko konpromisorik”.
SPEISeko langileen batzarrak erabaki zuen eranskinetako akordioaren negoziazioa plantilla handitzeko konpromisoaren baldintzapean dagoela. Jakinarazi dutenez, “konpromiso hori onartzen ez bada, langileen ordezkaritzak ez du negoziazioarekin jarraituko”. Negoziazioarekin jarraituz gero, SPEISeko langileen batzarrak gehiengoz bozkatu zuen proposamena negoziatzeko dokumentu gisa onartu zela.
Haien egoera azaldu zuten bi suhiltzailek joan den asteko astekarian egindako elkarrizketan.
