Helburu gehienak beteta, akordioa lortu dute Gizarte Ekintzako langileek, greba bertan behera utziz
Donostiako Udalak 2027rako lantaldea handitzeko konpromisoa hartu du, besteak beste.
Gizarte Ekintzako langileek aurrera eraman duten manifestazioko irudia.Maitane Aldanondo 
Mobilizazio egun askoren, lau eguneko lanuztearen eta hamabi eguneko grebaren ondoren, Donostiako Udaleko Gizarte Ekintzako Batzordeak aurreakordioa lortu du Donostiako Udalarekin. Azken uneko akordioak aldarrikapen nagusi gehienak jasotzen ditu.
Besteak beste, 2027ko urtarrilaren 1erako 16 langile berri kontratatuko dira gizarte langilearen, administrariaren eta psikologoaren kategorietan. Gauzak horrela, bihar hastekoa zen greba bertan behera geratu da.
ELAk eta LABek positibotzat jo dute aurreakordioa, eta nabarmendu dute borroka sindikala dela langileen eskubideak eta zerbitzu publikoen kalitatea defendatzeko tresna bakarra. Urte hasieran hasi zen gatazka, lan kargen igoerei aurre egiteko helburua zuen.
Langileek eskatzen zuten profesionalen araberako arreta ratioa murriztea eta plantilla handitzea eremu guztietan: administrazioa, gizarte langileak, hezkuntza, psikologia eta talde teknikoa, besteak beste. Greba batzordea udalarekin bilduko da datozen egunetan, akordioaren eduki guztiak zehazteko eta erabat ixteko.
