Donostialdeko osasun arreta «gainbeheran» dagoela eta Jaurlaritzaren Osasun Itunak porrot egin duela salatu du DOPAk
DOPAk ospitalean egin du elkarretaratzea.DOPA 
Donostialdeko Osasun Publikoaren Aldeko Plataformak (DOPA) gogor kritikatu du Osakidetzak eskualdean duen kudeaketa, eta Gotzone Sagardui Osasun sailburu ohiak aipatutako “kultura aldaketa” hura “zerbitzuen narriadura sistematikoa” dela salatu du.
Plataformaren esanetan, Imanol Pradales Lehendakariak eta Alberto Martinez Osasun sailburuak bultzatutako Euskadiko Osasun Ituna “zilegitasunik gabe” geratu da, herri plataformei parte-hartzea ukatu zaielako eta eragile askok, etsita, egitasmoa utzi dutelako.
EAGetako mediku faltak
DOPAk aurkeztutako datuen arabera, Donostialdeko Etengabeko Arreta Guneetan (EAG) egoera “tamalgarria” da. Iazko ekainetik urrira bitarteko datu zehatzak eman dituzte, egoeraren larritasuna agerian uzteko: Donostian, hiru zentrotatik bitan —Gros eta Amara Berri— erizainak soilik daude. Medikua egon beharko lukeen zentro bakarrean, Bengoetxean, txanden % 17,2an ez dago sendagilerik. Eta eskualdean, egoera ere ez da hobea, inguruko herrietan.
Guztira, Donostia osoan osasun arreta behar duten herritarrek txanden % 34,8an ez dute mediku presentzialik aurkitzen, 2024ko datuekin alderatuta nabarmen okerrera eginez.
Gardentasun falta
Plataformak Jose Agustin Agirre Aranburu gerente ohiari eta Maite Martinez egungo gerenteari egotzi die egoera honen erantzukizuna. DOPAren ustez, “isiltasuna” izan da zuzendaritzaren erantzun bakarra osasun zentroetako ordutegi murrizketen eta langileen gainkargaren aurrean: “Mediku faltaren aitzakiarekin, erizainei ez dagozkien lanak eginarazten zaizkie”, adierazi du DOPAk.
Gainera, salatu dute “gardentasun ezak” eragotzi diela 2025eko datu konparatibo guztiak eskuratzea, baina susmoa dute Donostialdeko ESIak Euskal Autonomia Erkidegoko estaldura medikorik txarrena izaten jarraitzen duela.
Bilera eskaera premiazkoa
Egoeraren larritasuna ikusita, DOPAk premiazko bilera eskatu dio Martinez gerenteari, egungo egoera “zuzendu” dezaten eta donostiarrei dagokien kalitatezko osasun arreta bermatu diezaieten: “Mobilizazioari esker Amara Berriko EAGa ez ixtea lortu genuen, baina zerbitzua barrutik husten ari dira”, amaitu dute.
