Donostialdeko ESIak ‘Konpromisoa’ aitortza jaso du, Euskadi Agenda 2030 sarietan
Donostiako ospitalea. Beñat Parra 
Donostialdeko Erakunde Sanitario Integratuak (ESI) pauso garrantzitsua eman du jasangarritasunaren eta gizarte erantzukizunaren arloan. Izan ere, Osakidetzako zentroak Euskadi Agenda 2030 Sarien harira ematen den ‘Konpromisoa’ aitortza jaso berri du, bere kudeaketa estrategian Nazio Batuen Garapen Jasangarrirako Helburuak (GJH) “modu eraginkorrean txertatzeagatik”.
Sari horiek Eusko Jaurlaritzak sustatzen ditu, eta haien xedea da 2030 Agendak markatutako erronkei erantzuteko konpromiso irmoa erakusten duten euskal erakundeak nabarmentzea. Donostialdeko ESIaren kasuan, epaimahaiak ahalegin berezia ikusi du osasun zerbitzu publikoa eta ingurumenarekiko zein gizartearekiko errespetua uztartzerako orduan.
Kudeaketa eredugarria
Konpromisoa maila lortzeko, erakundeak autoebaluazio prozesu zorrotza igaro behar izan du. Prozesu horretan, Donostialdeko ESIak frogatu du bere eguneroko jardunean emaitza zehatzak lortu dituela, jasangarritasunaren esparruan.
Aitortza horrek ez du soilik ingurumen kudeaketa saritzen; gobernantza ona, berdintasuna eta baliabideen erabilera eraginkorra ere baloratu dira. Saria jasotzean, erakundeko arduradunek adierazi dute aitortzak “bultzada handia” ematen diela lanean jarraitzeko.
Garaikur horrekin, zentroa kudeaketa jasangarrian erreferente gisa kokatu da Euskadiko osasun sarearen barruan.
