Espetxeratu egin dituzte Herrerako pabiloietako sutearen harira atxilotutako pertsonak
Herrerako Zardoya eremua.Joseba Parron San Sebastian 
Sute bat izan zen igandetik astelehenerako gauean Herrerako Zardoya-Otis eremuko pabiloietan, ustez, nahita eragindakoa, Donostiako Udaltzaingoaren ikerketaren arabera. Bi pertsona atxilotuta zeuden ordutik, eta epaileak espetxera bidali ditu, Efe albiste agentziak argitaratutako informazioaren arabera.
Sutearen eta sortutako kearen eraginez, pertsona bat Donostia Ospitalera eraman zuten, zaurituta baitzegoen. Beste hiru pertsona ere artatu behar izan zituzten, kea arnasteagatik.
Pabiloien egoera
Gogoratu behar da iragan industrialeko eremu horretako egoera txarra dela aspalditik, oso degradatuta baitago. Bestalde, kale egoeran dauden hamarnaka pertsona bizi dira bertan, oso modu zaurgarrian; 31 pertsona kaleratu zituzten urtarrilean.
Eremuan esku hartu dezala eskatu zion Ekialdeko Barrutiak udalari otsailean, bertan bizi diren pertsonen egoera hobetzeko. Era berean, aste honetan, Jon Insausti alkateak iragarri du eremuaren kanpoaldea garbituko duela udalak. Pabiloiak bota, eta 400 bat etxebizitza eraiki nahi ditu bertan udalak, herritar asko proiektuarekin ados ez badaude ere.
