Udalak hiriko kultur aniztasuna erakutsi du Garberan, Kulturen Arteko Asteari hasiera emanez
Atzo aurkeztu zuten Garberan, Kulturen Arteko Astea.Donostiako Udala 
Donostiako Udalak kultur aniztasunari buruzko dibulgazio erakusketa bat inauguratu zuen atzo, Garbera merkataritza gunean. Ekimen horrekin, hasiera ofiziala eman diote Kultura Aniztasunaren Zinegotzigoak bultzatutako 2026ko Kulturen Arteko Asteari.
Hilaren 24ra arte ikusgai egongo den erakusketa hogei panelez osatuta dago, eta hiriaren egungo errealitate askotarikoari buruzko begirada “argi, irisgarri eta datuetan oinarritua” eskaintzen du: Donostiako bilakaera demografikoa, aniztasunaren banaketa auzoen arabera, migrazioak hiriaren hazkundean duen garrantzia eta atzerritar jatorriko pertsonen ekarpen sozial, ekonomiko eta kulturalak aztertzen ditu.
Azaldu dutenez, erakusketaren helburua ez da soilik datuak “hotzean erakustea”, baizik eta hiriak bizikidetzarekin eta inklusioarekin duen konpromisoa indartzea.
Elkarbizitza eta aniztasuna
Iñigo Garcia Aniztasuneko, Inklusioko eta Ingurumeneko zinegotziak azpimarratu duenez, ekimenak hiri gisa nor garen hobeto ulertzen lagundu nahi du: “Donostia aldatzen ari da, eta aldaketa horren oinarriak bizikidetza, aniztasuna eta orainaren eta etorkizunaren parte diren bizi istorio askoren batura dira”. Gainera, eduki horiek erakunde espazioetatik kanpo ateratzearen garrantzia ere nabarmendu du: “Elkarrizketa hau leku bizi batean egotea nahi genuen, jendea dagoen, erosten eta paseatzen duen leku batean. Garberak oso ondo irudikatzen du egunero bizi dugun Donostia anitz hori”.
Alde beretik, Nuria Vegas Garberako gerenteak pozgarritzat jo du hiri irekiago eta kohesionatuago bat sustatzen duten ekimenetan laguntzea: “Aniztasuna ez da abstraktua, Garberan bizi dugun errealitate bat da, bai bisitatzen gaituztenen artean, baita hemen lan egiten dutenen artean ere”.
Egitarau zabala eta parte hartzailea
Kulturen Arteko Astea hilaren 15etik 23ra ospatuko da, baina programazioaren zati handi bat hilabete osoan zehar luzatuko da, auzo gehiagotara iristeko. Aurtengo edizioan hiriko hogei bat elkartek eta erakundek hartuko dute parte, baita Gipuzkoako Foru Aldundiko Kultura Departamentuak ere.
Datozen egunetako jardueren artean, honako hauek nabarmentzen dira: 40 jauzi argazki erakusketa: Paula Arbide argazkilariaren lana, EHUko Carlos Santamaria Zentroko Txillardegi aretoan, ikusgai; Kulturarteko topaketak: hainbat gizarte erakunderekin batera antolatutako espazioak; Kulturarteko bazkaria: CEBANCeko ikasleekin batera bultzatutako ekimena. Eta, azkenik, amaiera kontzertua: hilaren 23an Intxaurrondon egingo dute, hiriko kultura aniztasunaren erakusgarri handi gisa.
