Musikeneko harpa irakasle baten irainak eta abusuak salatu dituzte hainbat ikaslek
Musikene zentroak jakinarazi du "arretaz" ikertuko dituztela salaketak, eta ustez jazarriak izan diren ikasleak zuzendaritzarekin harremanetan jartzera deitu ditu.
Musikene zentroaren eraikina, Ibaetan.Musikene 
Donostian kokatutako Musikene Euskal Herriko Goi Mailako Musika Ikastegiko hamar harpa ikasle eta ikasle ohik eta Parisko Rueil-Malmaison kontserbatorioko beste ikasle batek C.I. emakumezko irakaslearen usteko “abusuak, umiliazioak eta tratu txarrak” salatu dituzte, Eldiario.es hedabideak argitaratutako informazioaren arabera.
Komunikabide horrek, bere informazioan dioenez, hamabost hilabete pasatu ditu kasua ikertzen eta 50 elkarrizketatik gora egin ditu. Informazioaren aurrean, Musikenek komunikatu bat argitaratu du, nabarmenduz “arretaz” ikertuko dituztela salaketak.
“Hirugarren pertsonen aurkako irainak eta errepresio akademikoak” deskribatu dituzte ikasleek, aipaturiko hedabidearen arabera: “Lekuko batzuek tratamendu psikologikoa edo psikiatrikoa behar izan dute. Gehienek lesio fisikoak izan dituzte behartzen dituzten instrumentua jotzeko moduagatik”. Halaber, Eldiario.es-ek zehaztu du ustezko biktima guztiek 20 eta 40 urtean dituztela eta gizonak zein emakumeak daudela tartean.
Horrela, Musikenek salatzaileei eskatu die zentroarekin harremanetan jartzeko, kasua aztertzeko. Era berean, gogorarazi du irakasleak “errugabetasun presuntzioa” duela. “Musikenek bere hezkuntza komunitatearen ongizatearekiko konpromisoa berretsi du, eta, horregatik, argitaratutako informazioak arretaz aztertu eta ikertuko ditu”, gaineratu du goi mailako hezkuntza zentroak.
