Donostia Sustapenak 2026ko Berrikuntza Planeko lehen programa sorta aktibatu du
Ekinn programaren egoitza. Donostia Sustapena 
Donostia Sustapenak abian jarri du 2026ko Berrikuntza Planaren lehenengo laguntza eta programa sorta. Plan horrek guztira 6,5 milioi euroko zuzkidura du, eta horietatik 2,6 milioi laguntza ekonomikoetara bideratuko dira, enpresa proiektuen berrikuntza, hazkundea, ekintzailetza berritzailea, gazteen talentua, hiri ekonomia eta kalitatezko enplegua indartzeko.
Ane Oyarbide Ekonomia eta Tokiko Enpleguko zinegotziak azaldu duenez, pakete horrek hiriak berrikuntzaren eta ekintzailetzaren alde egindako apustua islatzen du, enpresei beren sorkuntza, finkatze eta berrikuntza prozesuetan lagunduz. Bestalde, Iñigo Olaizola Donostia Sustapeneko zuzendari gerenteak azpimarratu du baliabide hauek enpresen beharretara egokitzeko eta haiei bidean laguntzeko aktibatu direla, bai gazteenentzat eta bai sendotze prozesuan daudenentzat.
Laguntzak lau ardatz estrategikoren inguruan egituratzen dira: hiria ekintzailetza berritzaileko gune gisa indartzea, Donostia zientziaren hiri eta berrikuntzako plataforma gisa sustatzea, berrikuntza aukera berriak sendotzea Hiri Ekonomian, eta tokiko talentu gaztearen garapen profesionalerako proiektuak sustatzea.
Berrikuntza publikoa eta hiriko erronkak
Ardatz horiekin batera, zuzkidura ekonomikorik gabeko programak ere abiarazi dira administrazioaren, herritarren eta enpresen arteko lankidetza sustatzeko. Ideien lehiaketaren bitartez, hautatutako proposamenak proiektu pilotu bihurtu ahal izango dira; gaur egun, dagoeneko bi start-up ari dira soluzioak probatzen Udaltzaingoarekin eta Mantentze Sailarekin.
