Bagera elkartea omenduko dute Donostiako Piratek
35 urte beteko ditu Donostiako Euskaltzaleen Elkarteak, eta Piratek nabarmendu dutenez, inoiz baino beharrezkoagoa ikusten dute euskaltzaleak antolatzea, elkarrekin saretzea eta euskararen aldeko konpromisoa eguneroko praktikatik eraikitzea.
Donostiako Piraten agerraldia, kaian.Maddi Viana 
Gaur goizean egin dute kaian 2026ko Donostiako Piraten Aste Nagusiaren aurkezpena, eta aurtengo Matti pertsonaia nor izango den iragarri dute: Bagera Donostiako Euskaltzaleen Elkartea. Haien ibilbidea eta egiten duten lana lehen lerrora ekarri nahi dute Piratek.
35 urte beteko ditu Bagerak eta Piratek agerraldian adierazi dutenez, inoiz baino beharrezkoagoa ikusten dute euskaltzaleak antolatzea, elkarrekin saretzea eta euskararen aldeko konpromisoa eguneroko praktikatik eraikitzea: “Hizkuntza bat ez baita egun seinalatuetan bakarrik biziberritzen; kalean, tabernan, lanean, auzoan eta jaietan erabiltzen baizik”.
Matti Piraten balioekin bat egiten duen herri eragile, elkarte edo talde ezberdin bat da urtero, eta besteak beste txupinazoa emateaz arduratzen da. Aurreko urteetan Matti izan direnen artean etxebizitzaren alde borrokatzen dutenak, feminismoaren alde antolatutako mugimenduak, komunikabide herrikoiak, auzo elkarteak eta elkartasun sareak egon dira.
Bota sarea irlatik hirira
Aurten ere, zortzi eguneko egitaraua prestatu dute Donostiako Piratek Aste Nagusirako, eta abuztuaren 8tik 16ra ospatuko da. Hilaren hasieran aurkeztu zuen kontzertuen kartela mugimenduak, baina egunean zehar ere jarduerak antolatu ditu: bertso saioak, kalejirak, kuadrillen arteko jolasak, play-back lehiaketa, azoka eta herri bazkariak, besteak beste. Abordatzea abuztuaren 10ean izango da, eta aurten ere, Piraten Eguna ospatuko dute, abuztuaren 12an, egun osoko egitarau berezi eta bateratuarekin.
Bota sarea irlatik hirira leloa aukeratu dute aurten, eta argi dute jai herrikoiak ez direla ospatzeko espazio hutsak, haien “balioak eta konpromisoak” ere bertan islatzen direla badakite, eta horregatik, jaiak herri ereduarekin koherenteak izan daitezen ahalegindu dira.
Palestinako sarraskiaren inguruan ere aritu dira Piratak prentsaurrekoan, mugimenduak adierazi du ezin dela normaltasunez hartu, eta beharrezkotzat jo du nazioarteko presioa areagotzea Palestinako herriaren eskubideak defendatzeko. Horregatik erabaki du Coca-Colaren aurkako nazioarteko boikotarekin bat egitea, beraz, Aste Nagusiko Piraten guneetan ez da enpresa horren produkturik egongo salmentan.
Bestalde, Aste Nagusi Pirataren muntaketa, soinu eta argiztapen teknikarien grebaren aurrean bere elkartasuna erakutsi du mugimendu piratak eta honakoa adierazi du: “Jaiak ez lirateke posible izango haien lanik gabe, eta horregatik, bidezko lan baldintzak aldarrikatzen dituztenean, haien borroka ere gurea dela ulertzen dugu”.
Erasoei erantzuna
Urtero legez, Donostiako Piratek puntu morea jarriko dute gunean, kaian erasoak salatzeko espazio seguru bat eskaintzeko. Bertan salaketa egiteaz gain, beharko lukeenari, Bulebarreko artatze gunera lagunduko zaio; “kontziente gara artatzeak pertsona profesionalek egin behar dituztela” adierazi du mugimenduak. Hala ere, Donostiako Piraten lantalde feministak garbi ikusten du artatzeko puntu bakarra ez dela nahikoa eta profesionalez hornituta egongo diren puntu more gehiago jartzea eskatu dizkio Donostiako Udalari. “Gure barkuan Transfeminismoa dugu ipar” adierazi dute Donostiako Piratek, eta horregatik haien protokoloetan sakontzen jarraitzen dutela nabarmendu dute.
Bestalde, mugimenduak jakitera eman du aurreko urtean ekin ziola hausnarketa eta lanketa antiarrazistari, eta aurten ere errepikatu dute: jaiak denontzako izatea nahi dute eta ez dute inolako jarrera arrazistarik onartuko.
Erasoen aurrean erantzuna emango dutela argi dute Donostiako Piratek eta horregatik abuztuaren 15ean 19:30ean agerraldia egingo dute, erasoek jarraitzen duten artean “aurrean egongo garelako, eta hauei aurre egitea denon ardura delako”.
Horren harira egin du mugimenduak Kalejira Transfeminista aldarrikatzailera bertaratzeko gonbita, abuztuaren 11an izango da eta ekintza ezberdinak, ikuskizunak eta musika emanaldiak antolatu ditu mugimenduak Sardiñeren kofradiarekin elkarlanean.
