Paladaz palada, Donostia Arraun Lagunak-ek banderak irabazten jarraitzen du
Donostiarrako mutilek eta neskek ez dute astebururik onena izan Galiziako uretan, ohorezko postuetatik kanpo ibili direlako.
'Lugañenea' ontzia Bueuko estropadan.Aitor Arrizabalaga 
Tematuta jarraitzen dute batzuek izena eta abizena ez jartzearekin. Donostia Arraun Lagunak da klubaren izen zuzena, eta haiek ere tematuta segitzen dute, baina bandera kontuekin. Euskotren eta Eusko Label ligak aintzat hartuta, Lugañenea ontzia da estropada guztiak irabazi dituen bakarra. Dagoeneko zazpi dira, asteburuan Galiziako uretan jokaturiko biak ere eskuratuta.
Larunbatean Chapelan eta atzo Bueun aritu ziren bi ligetako traineruak. Bietan nabarmendu ziren bi liderrak, Arraun eta Orio, eta lidergoak sendotu dituzte. Euskotren ligan, Donostia Arraun Lagunak-ek bere nagusitasuna erakutsi zuen bi estropadetan, eta Tolosaldea sailkatu zen bigarren, haien atzetik ondoen dabilen ontzia delako.
Donostiarrako neskak, Bueuko estropada eremuan.Aitor Arrizabalaga
Donostiarrako neskek, ordea, seigarren eta zortzigarren postuekin konformatu behar izan ziren. Horrek ez die balio sailkapeneko putzutik ihes egiteko. Arraun, berriz, lider sendoa da 56 punturekin.
Donostiarrako mutilek, berriz, ohorezko txandan sartzeko helburuari eutsi nahi diote, kosta ala kosta. Ordea, ez da batere erraza izango Torrekua II ontziarentzat. Larunbatean, bigarren txanda ezin izan zuten irabazi, baina bosgarren tokian bukatu zuten. Aldiz, atzo, erakutsitako mailatik urrunago ibili ziren, eta zortzigarren postuan bukatu zuten. Horiek horrela, sailkapenean koxka bat egin dute behera, eta, orain, seigarren tokian daude 53 punturekin.
‘Torrekua II’ ontzia, Bueuko uretan.Aitor Arrizabalaga
