Dastaketa bat, gutiziena
Udako beroari aurre egiteko izozki dastaketa freskagarri baten gisa aurkezten digu aurtengo Donostiako Musika Hamabostaldia Ignacio Arakistainek: betiko «zapore» klasiko eta arrakastatsuen itzulerak —hala nola Juan Diego Florez edo Grigory Sokolov— sorkuntza berritzaileekin eta interprete gazteen freskotasunarekin uztartuko dira edizio honetan.
Grigory Sokolov piano jotzailea.Musika Hamabostaldia 
Hondartzarako bidean dela, sumatzen ditu batek ostertzean udako beroaren aringarri izan ohi ditugun musika jaialdien afixak, farolen ertzetan agertzen. Autobusean doanean bat, bere oporraldia probintziako edozein txokotan zukutzera, agertzen zaizkio pantailan etorriko diren kontzertuen berri eta iragarkiak. Uda lotzen du batek, nahigabe lotu ere, herriko festen xarmarekin; suzko erroberen eztanda, txosnaguneko parranda edota berotzarrari lasaigarri zaion bat-bateko kazkabar udatiarra. Uda bada egoteko modu bat, ikasturte arteko oasia zenbaitentzat, errutinari iskin egiteko bidezidor bat. Saihesbide horietakoren batek ziur garamatzala arestian aipaturiko festibal horietakoren batera. Izan poperoa berau, jazzez blaitua ala klasikoaren aterpe fidela. Kasuon, dastaketa bat proposatu nahi nizuke, irakurle, zapore ezberdinetako proposamenena berau, hain udari lotuak ditugun izozki ezberdinekin egin ohi den antzera. Hona hemen aurtengo Donostiako Musika Hamabostaldiak ekarri dizkigun gutizien aukeraketa gozagarria.
Beti egon ohi da etxeko txikienak nahiz aitona-amonak ados jartzen dituen izozki mota konkretu bat. Salduenen zerrenda preziatu horretan topatu genitzake txokolate beti segurua edota limoizko bola freskagarria. Musikara ekarriz arrakastatsuenen liga berezi hau, izen batzuk aipatzeko aurtengo Hamabostaldiari dagokionean. Azpimarratuko nuke Juan Diego Florez abeslari perutarraren itzulera. Urte zenbaitez Donostiako agertokiak zapaldu gabe izan ostean, zikloari ekingo dion egunean bertan izango dugu gurean, ahots eta piano errezitaldi mamitsu bat eskaintzeko asmoz. Bertan, zenbait opera entzutetsutako ariez gozatzeko aukera izango du batek, Florezen ahots boteretsu bezain lirikotasunez betean. Galdu ezin den beste zapore bat, Grigory Sokoloven pianoarena da. Ahoan intentsua, ñabardurez betea. Sokolov aski ezaguna dugu Urumea ertzotan, baina beti zaio kitzikagarria bati negu luzearen ostean, horrenbeste gozarazi dionari berriro kosk egitea. Eta bestseller deituriko taldean, Riccardo Chailly zuzendari italiarraren buelta nabarmenduko nuke. Duela pare bat urte, La Scalako orkestra itzelaren parean, kontzertu gogoangarri bat oparitu zigun, Ravel eta Tchaikovskyren lanak interpretatuz. Kukurutxoa aitaren batean agortu zitzaigun orduko hartan eta irrikaz gaude beste behin barratik Chailly izozkigileak oparituko diguna dastatzeko.
Musika Hamabostaldia, gune nagusietan egoteaz gain, Tabakalerara, elizetara edota Euskal Herriko beste txoko batzuetara ere zabaltzen da
Ugariak dira, klasiko handi hauez gain, erosleak denda partikular honetan topatuko dituen gutizi erakargarriak. Zapore berritzaileenen apalean, Miramar Jauregian ospatu ohi diren interprete gazteenen zikloko kontzertuak ditu batek. Musikeneko ikasle diren edo izan direnen ilusioak eta agertokia zapaltzeko gogoak beti dakar zapore freskoa ahosabaira. Konbinazio apurtzaileei eta gazi puntutik ere baduten gustuei leku egiteko parada aparta. Musika garaikidearen zikloak, berriz, dendara iritsi berri diren produktuen erakusleihoa eskainiko digu. Berrienen bilduma horretan, nabarmentzekoa Sigma Project saxofoi taldeak estreinatuko duen Jon Esnaola (Tolosa, 2000) gazte talentudunaren pieza berria. Kursaaleko balio anitzeko aretoak utziz, aurtengoan ziklo honetako kontzertuak Tabakaleran ospatuko dira. Urumearen ertz horretan, baita ere, dantzak bere lekua izango du Hamabostaldian. Musika dugu oraingo honetan izozki eta dantza izan liteke polo edo beste mota bateko gozoki. Modalitate ezberdineko artea berau, baina musikarekin ezin hobeki ezkontzen dena mihi gainean. Ion Munduate, Paula Quintana eta Lorena Nogalen sorkuntza berrienez gozatzeko aukera, dantzari eskainitako atal honetan.
Viktoria Eugenia antzokia, Musika Hamabostaldiko ekitaldi batean.Musika Hamabostaldia
Badira urte luzez izozki dendetan presentzia nabarmena izan duten zaporeak. Badatozkit burura amarena zapore karakteristikoa, rona eta mahaspasak batuz eratzen dena edota kafearena, esaterako. Nobleziaren Donostia hartan, kanpotik zetorrenaren egarri eta goseak baretu ei zituzten, ziurrenik, zapore klasikoago hauek. Organo zikloarena da, urte luzez, hutsik egin ez dutenen talde honetan sailkatu genezakeena. Aurtengoan ere nabariak izango dira ziklo honetan, eliza zoragarrien aterpean, eta dohainik, gauzatuko direnak. Wolfgang Seifen alemaniar inprobisatzailearen kontzertua Artzain Onaren Katedralean edota Thomas Ospital, aurtengo Organo Erromantikoaren Nazioarteko Ikastaroan irakasle izango denak Santa Marian eskainiko duena, jarriko nituzke balioan. Hauez gain, izango da probintzian barnako organo ezberdinen soinu kalitate gorenaz gozatzeko mentura ere.
Zuzenean musika ardatz ez bada ere, musika eta gorputz adierazpena uztartzen dituzten dantza ikuskizunak ere izango dira
Kaloriaz beteriko festa hau amaitze aldera –uda ere bada ba, dietari muzin egiteko aitzakia aparta–, Juan Crisostomo Arriaga musikari bilbotarraren heriotzaren bigarren mendeurrena ospatzeko Juanjo Menak zuzenduko duen kontzertua aipatuko nuke. Menaren agurra izango da Hamabostaldian, alzheimerrak jota oholtzak urte amaieran uztea erabaki baitu. Txalotzekoa orain artean gaixotasunari aurre egiteko erakutsitako kuraia, eta hunkigarria, ziur, azken dantza honek entzuleoi nahiz berari emango diguna. Azkenik, ibiltaria den sukurtsala ere badu negozio gozo honek. Musika Aitzaki zikloak eramango ditu aipaturiko galdu ezin diren zaporeak Euskal Herriko txoko hainbatetara. Bidaiotan bereziena, Arantzazun abuztuaren 20an, Natxo de Feliperen itzulera eskainiko diguna. Hori bai izozki ikonikoetan gogoangarriena.
Hauek eta beste, uda sasoia freskatzeko balioko diguten izozki dastaketan. Entzule, har ezazu beldurrik gabe kartera, eskainiko dizuten plazererako, merkeak dituzu gutiziok eta. Hantxe izango nauzue, zupa eta zupa, agortu arte musikaren zirrara.
