Donostiak Zuatzurako autobus konexio bat martxan jartzeko eskatuko dio aldundiari
Zuatzu. 
Udalbatzak aho batez onartu du Gipuzkoako Foru Aldundiari eskatzea, inguruko udalerrien eta Zuatzuko enpresa parkearen artean garraio publikoko zerbitzuak ahalbidetzeko.
Erabakia Alderdi Popularrak egindako proposamen baten harira etorri da. Gaur egun, parke horrek Dbusen 5. linearen bidezko zuzeneko konexioa dauka, baina konexio zabalagoak lortu nahi dituzte.
Udal taldeen erreakzioak eta eskaerak
Proposamenak talde guztien babesa jaso badu ere, Udalbatzan hainbat ñabardura azaldu dituzte ordezkariek:
Olatz Yarza Mugikortasun ordezkaria poztu egin da PPk garraio publikoaren aldeko jarrera hartu duelako, gogoraraziz aurreko osoko bilkuretan ibilgailu pribatuentzako aparkaleku gehiago eskatzen zituela, parke horretan. Zehaztu duenez, Lurraldebusek zerbitzua bermatzea positiboa litzateke, baina ohartarazi du aldundiak baloratu beharko duela horretarako “gaitasun ekonomiko nahikoa” duen ala ez.
EH Bilduk eta Elkarrekin Donostiak, ordea, mugikortasunaren inguruan “elkarrekin hausnartzera” deitu dute. Horrez gain, gogora ekarri dute Mugikortasun Jasangarriaren Planaren arabera, parkean diharduten enpresek ere garraio komunitarioa hobetzen lagundu behar dutela.
Eskuzaitzetako linearen aurrekaria
Aldundiak Zuatzurako eskaera bere gain hartu eta Lurraldebusen sarean sartuko balu, berriki onartu den Eskuzaitzetako konexioari gehituko litzaioke. Hala, irailetik aurrera, Eskuzaitzetako poligonoak BU15 linea izango du erabilgarri, astelehenetik igandera, 05:30etik 22:30era bitartean. Lineak zenbait industria gune, Realaren instalazioak, Zubietako espetxe berria eta erraustegia lotuko ditu.
