Pilotakada bakoitza gertu sentitzeko, Antiguako Pilota Txapelketa
Badator 78. Antiguako Pilota Txapelketa. Emakumeen lehiaketa sendotuta eta euskara irizpide irmo gisa hartuta, abuztuan zehar, tradizioa, kirola eta auzo giroa uztartuko ditu txapelketak, ohi bezala.
Antiguako Pilota Txapelketako artxiboko irudi bat.Antiguako Pilotazaleok 
Bueltan da Antiguako Pilota Txapelketa. 78. aldia beteko du, eta, ohi bezala, auzoko pilotaleku txikia zaleen eta etorkizuneko izarren topaleku bihurtuko da. Antiguako Pilotazaleok elkarteko Iñigo Viana eta Joseba Urzelai antolatzaileentzako, ez da nolanahiko txapelketa: zaleen mailako erreferentzia nagusietako bat da, beste askorentzat eredu bilakatu dena.
Profesionaletarako zubia
Antiguako frontoia edukieraz txikia bada ere –250 lagun eskasentzat tokia du–, neurri horrek ez du ezkutatzen bertako kirol maila ikaragarria: egun esku pilotan profesional mailan ari direnen %98ak Antiguako txapelketan jokatu du, noizbait. Harribitxiak leuntzeko eta erakusteko plaza ezin hobea da, zalantzarik gabe.
Gizartearekin batera moldatzen
Urteek aurrera egin ahala, txapelketak jakin du garai berrien erritmora dantzatzen; horren adibide da, esaterako, 2016az geroztik finkatuta dagoen emakumeen txapelketa. Aurten, guztira, lau bikote lehiatuko dira. Hauek, ordea, finalerdietan sartuko dira, zuzenean, gizonezkoen txapelketa finalerdietara iristen denean.
Frontoiaren edukiera arazo izan ohi da, jende asko hurbiltzen baita Euskal Herri osotik zein Errioxatik, eta ez baitute sarrerarik lortzen. Pandemiaz geroztik, ordea, inguruko taberna batzuetan streaming bidez ematen dituzte partidak. Hala, pandemiak utzitako irakaspen hura, auzoko gazteak pilotalekuaren altzora erakartzeko zubi ezin hobea bilakatu da.
Euskara, ardatz
Pilotarien kolpeek bezainbesteko oihartzuna du euskarak txapelketan. Euskal Herrian bere osotasunean euskara hutsean egiten den txapelketa bakarra da, eta irizpide irmoa da hori antolatzaileentzat. Bide horretan, urrats garrantzitsua da Irutxuloko Hitza lehenengo aldiz babesle ofizial izatea.
Abuztu pilotazale bat
Ligaxkako partidak abuztuaren 4an hasiko dira, eta astearte zein asteazkenetan jokatuko dira. Final handiak, berriz, abuztuaren 29an izango dira.
Kirolaz eta giroaz harago, esker onari ere tartea egingo diote, aurten. Izan ere, txapelketaren lehenengo jaialdia Joseba Lezeta kirol kazetari ezagunaren omenez egingo dute, Antzuolan. Erretiroa hartu berritan, antolakuntzak argi du txapelketaren hedapenean urte hauetan guztietan egin duen lan eskerga aitortu behar zaiola, kantxa erdian.
Pilotariak hormaren kontra jotzen du pilota, eta 250 eserlekuk, pilotakada bakoitzak, hainbeste definitzen duen gertutasun horrek, etorkizunaren oihartzuna mundu osora zabaltzeko plaza handi bat sortzen dute; 78 urteko historia bat. Pilotak eta euskarak bat egiten duten bitartean, Antiguak argi uzten du txikiak diren lekuek ere mundua mugitu dezaketela.
