Kutixik aurkeztu dute bosgarrenez, euskara hutsez egindako jaialdi autogestionatua
Xabier Badiola musikaria. 
Balio Dute kolektiboak beste urte batez antolatu du Kutixik jaialdia Donostia Kulturaren laguntzarekin. Aurten ere, euskara hutsez abesten duten eta autogestioaren filosofian lan egiten duten artistekin osatu dute afixa.
2026ko Kutixik jaialdian Gartxot eta Xabier Badiola (biak Balio Dute kolektiboaren parte), Harat, Ithaka, Eire eta Mäirü taldeak ariko dira Intxaurrondo Kultur Etxean eta sarrerak jada salgai daude Donostia Kulturaren webgunean. Kartel biziaren egilea Malen Otxoa andoaindarra izan da.
Gartxot
Hainbat taldetan ibili izan da Gartxot Unsain kantautore donostiarra, hala nola Yaw, Madeleine, John Berkhout, Bananas, Pastoriza Anaiak, Grises eta Bi Zaldi. 2018an bakarkako bideari ekin zion Ghau proiektuarekin.
Gitarraren soiltasuna eta artifiziorik gabeko ahotsa baliatuz, bilaketa emozional zintzo bat egin nahi izan du Gartxotek Bizirik gaude azken diskoan, kantautore gisa, lehen aldiz bere izena daraman 11 kantuko soinu-unibertsoa eraikiz. Gartxot Unsain (gitarra, ahotsa).
Xabier Badiola
Xabier Badiola gitarrista eta kantugile eibartarrak 2023an egin zuen bakarkako debut akustikoa urteetan zehar Rock psikodeliko eta progresiboko hainbat taldetan aritu eta gero. Bere bigarren bakarkako Leiho ondoan xori bat izeneko hamar abestiko lana kaleratu du 2026ko martxoan.
Harat
Harat Ibai Gogortza beratarraren proiektua da. Besteak beste, Borrokan, Mice, Joseba B. Lenoir eta JIEL taldeetan gitarrista moduan aritzen da eta hau du bere lehenengo bakarkako lana, lehen aldiz ahotsa ere bere gain hartuko duena.
Esperimentaziotik rockera bitarteko soinuak libreki jorratzen ditu Haratek, 2022an kaleratutako diskotik tiraka prestatutako zuzenekoan. Ibai Gogortza (gitarra, ahotsa), Iñigo Telletxea (baxua), Mattin Arbelaitz (bateria).
Ithaka
Ithaka Orioko eta Zarauzko lau kidek 2021. urtean sortutako taldea, alt-rock, stoner, post-punk eta post-rock doinuetan mugitzen da. Maiatzean argitaratutako Ez naiz itzuliko EP laburra aurkeztera dator, besteak beste. Josune Freire (bateria), Eneko Eizagirre (baxua), Arantza Igartua (gitarra), Leire Olariaga (ahotsa, teklatua).
Eire
Eire Maia eta Eire Salegi zumaiarrek osatzen duten Eire musika taldea da. Popa lantzen dute, ukitu elektroniko eta urbanoekin. Estatu Batuetako pop alternatiboan topatu dituzte euren erreferentziak, euren sintetizadore soinu atmosferikoekin uztartzeko. Eire Salegi (sintetizadoreak, gitarra), Eire Maia (ahotsa, letrak).
Mäirü
Ziburuko musika talde bat da, instrumentu organikoak eta elektronikoak uztartzen dituen elektro-folk eta munduko musika estilokoa. Orkestra txiki baten antzera aritzen dira, soinu tradizionalak eta modernoak batzen dituzte, giro tribal, mistiko eta dantzagarriak sortuz. Txomin Ugartemendia (sintetizadoreak), Peio Erramuspe (perkusio, bateria), Nagore Etxabe (perkusioa/bateria, txalaparta), Txomin Dhers (txalaparta), Pierre Sangla (txalaparta), Clément Laval (gitarra), Annelise Arnaud-Cazamayou (harmonium, ttunttuna).
