«Sekulakoa izan zen bat irabaztea, eta orain onenen marka berdindu dezakegu»
Bosgarren Euskotren liga irabazi berritan, bosgarren Kontxako Bandera du begiz jota Xubane Uribarrenak (Gros, 1999). Izan ere, Donostia Arraun Lagunak-eko bost arraunlarik aukera dute bosgarrenez irabazteko, eta bera da horietako bat.
Xubane Uribarrena, Donostia Arraun Lagunak-eko arraunlaria.Inaxio Esnaola Aranzadi 
Bosgarren liga irabazita, bosgarren Kontxako Banderaren txanda da?
Hori lortzeko gabiltza lanean, eta taldea mentalizatuta dago. Denboraldi hasieratik, helburua liga eta Kontxa irabaztea da, eta lehena lortu dugu. Ongietorriak dira irabazitako estropada eta bandera guztiak, baina helburua liga bera eskuratzea zen. Orain, taldea bosgarren Kontxaren bila doa.
Euskotren ligako marka guztiak hautsi dituzue, lehenak izan zaretelako jokaturiko estropada eta bandera guztiak irabazten. Horrela, 2024ko sasoi bikaina hobetu duzue. Halakorik espero zenuten?
Nire ustez, taldeak konfiantza asko zuen negutik. Lehiatzen hasi ginen momentutik orain arte, momentu txar oso gutxi izan ditugu. Oso ondo aritu gara, eta taldeak bere blokea hein handi batean mantendu du. Horrek konfiantza eman digu. Gainera, gugan asko sinetsi dute Juan Mari Etxabek, Alberto Grijalbak eta Jacobo Vazquezek.
Ligan, asteburuz asteburu egin dugu aurrera, eta dena ondo atera zaigu. Halere, taldean ez dugu behin ere buruan izan dena irabazi behar genuenik. Egia da ere, Zarauzko bigarren jardunaldia iritsi zenean, urduritasun puntu hori genuela, duela bi urte irabazi ez genuen estropada bakarra izan zelako. Aurten, ordea, hori ere irabazi dugu. Finean, ikusi dugu lor daitekeela oso zaila dena.
«Egin ziguten harrera presio kontu bat izan zela iruditzen zait, adierazpen batzuen ondoren iritsi zelako»
Tolosaldea eta San Juan izan dira zuengandik hurbilen ibili direnak, eta Orio espero baino atzerago. Ligako traineruen maila esperotakoa izan da?
Talde batzuek aldaketa asko izan dituzte, baina momentu jakinetan, horietako batzuk gugandik gertuago egongo zirela uste genuen. Horrela ere, une batzuetan estutu gaituzte. San Juan izan da ligako ezustekoa, talde oso gaztea duelako. Oriok, berriz, aldaketa asko izan ditu, eta ligak aurrera egin ahala, hoberantz egin du. Eta Tolosaldearekin borroka gehiago izango genuela uste genuen.
Bestalde, aurten, lehen eta bigarren txandako postuak ez dira horren finkatuak egon, eta ondorioz, gure arerio zuzenak lehen txandan aritu izan dira. Hori dela eta, errendimenduari baino, beste aldagaiei begira egon gara; kalea, itsasoa, haizea eta beste. Izan ere, horiek baldintzatu dezakete bandera bat irabaztea edo galtzea.
Donostiako Udalak ligako titulua jasotako egunean egin zizuen harrera, alkatea falta bazen ere. Zuen entrenatzailea, ordea, kritiko agertu zen elkarrizketa batean aurrez ez zenutelako aitortzarik jaso. Ados zaude?
Nik ulertu dezaket irabazitako estropada eta bandera bakoitzeko harrerarik ez egitea, eta hainbat eskuratuta egitea. Ordea, besterik irabazten ez bada, ez al da hobe lorpen bakoitzeko aitortza egitea? Plaza Berrian jaso gintuzten udaleko ordezkariek, polita izan zen, baina egin ziguten harrera presio kontu bat izan zela iruditzen zait, adierazpen batzuen ondoren iritsi zelako.
Arraunean, denborak, markak eta palmaresa garrantzitsuak dira. Ligan, San Juanen marka berdindu duzue, eta, orain, Kontxan gauza bera lor dezakezue. Izan ere, San Juanek berak eta Galiziak bosna Kontxa dituzte. Hori lortzea ikaragarria izango litzateke?
Ikaragarria da bakarra lortzea. Iruditzen zait Donostian arrauna ez dela puntako kirola, Kontxako Bandera dugun arren. Arrauna ez da hiri honetan gehien babesten den kirola, eta nabarmentzekoa da klub batek emakumezkoen traineru baten proiektua mantendu eta indartu duela. Horri esker iritsi dira Kontxako Banderak. Esan moduan, sekulakoa izan zen bat irabaztea, eta, orain, traineru onenen marka berdintzeko aukera dugu. Oraindik ez gara kontziente lortu dugunaz, eta imajinaezina iruditzen zait noraino iritsi garen.
«Kirol legez erakutsi dugu hiriko traineru onena garela, eta guri dagokigu Donostia ordezkatzea»
Horretarako, aurten ere, sailkatze estropada aurreztuko duzue, iazko araudi aldaketarengatik. Oraindik ere bada ulertzen ez duenik…
Araudia arrazoi batengatik aldatu zuten, eta hamar urte geroago mantentzen bada, berdina pentsatuko dute ados ez daudenek. Bere garaian, hiriko traineru bat baino gehiago zegoenean, haien arteko kanporaketa jokatzen zen moduan, orain, ligan ondoen bukatzen duen ontzi donostiarrak lortzen du zuzenean sailkatzea. Kirol legez erakutsi dugu hiriko traineru onena garela, eta orain gurea dela Donostia ordezkatzeko postu finko hori. Bidezkoena iruditzen zait emakumezkoen Kontxako Banderarentzat.
Datozen bi igandeetarako, zer da Arraunek bandera irabazteko egin behar duena?
Orain artekoa mantentzea, ezer aldatu gabe. Lasaitasunarekin hartu behar dugu, badakigulako gure lana egiten badugu, Kontxako Bandera irabaz dezakegula. Hori bai, uretan gogor aritu beharko dugu, arerioak gogotsu daudelako gure aurrea hartzeko. Lehen igandean gauzak txukun egiten saiatuko gara, Kontxako Bandera astintzeko erabakigarria izan ohi delako.
