Jai Alai ligaren lauko finala hartuko du bigarrenez Donostiak
Jai Alai txapelketaren lauko finalean lehiatuko diren puntistak, Carmelo Balda pilokalekuan.Jai Alai 
Donostia Kirolak bigarren urtez antolatu du Jai Alai ligako lauko finala, “zesta puntuaren distira” nabarmentzeko. Gaur goizean egin dute aurkezpena, Amara Berriko Carmelo Balda pilotalekuan, eta han jokatuko dira finaleko partidak.
Iazko urrian abiatu zen Jai Alai liga, eta ordutik hona, 260 partida ofizial jokatu dira hemeretzi frontoitan. Euskal Herria, Frantzia eta Florida (AEB) zapaldu dituzte Jai Alaiko puntistek. 44 txapelketa puntuagarri guztira, gizon zein emakumeen kategoriatan. Orain, sailkapeneko zortzi onenek izango dute soilik lauko finala jokatu eta liga irabazteko aukera.
Udalak gogoratu du iazko lauko finala arrakastatsua izan zela, eta aurten errepikatzeko asmoa dutela. ETB1ek neurketa guztiak eskainiko ditu, 21:45etik aurrera.
Finalerako bidea
Erregulartasuna da Jai Alai ligako lauko finalera iristeko gako nagusia. Gizonezkoen lehen mailan, hamar Slam, hemeretzi Master eta bost Serie jokatu dira: Eusko Label Winter Seriea, Donibane Lohizuneko Nazioartekoa, Bilboko Iron Kopa, Floridako Biscayne Kopa eta Miarritzeko Urrezko Xistera, besteak beste. Gehiago edo gutxiago jokatu, puntista bakoitzak sei Slam eta zortzi Master puntuatu ditzake gehienez ere, eta horri esker, berdintasuna izan da nagusi Paueko (Frantzia) azken jardunaldira arte.
Denboraldiko aurrelaririk onena Xabi Barandika gernikarra izan da, ligako egungo txapelduna. Winter Seriean lesio larria izan arren, kantxetara itzuli eta udara ikusgarria jokatu du, Gernikan, Donibane Lohizunen eta Pauen irabazita. Orain, bere hirugarren ligako titulua izango du jokoan, sailkapenean Erkiaga, Urreisti eta Johan Sorozabalen aurretik bukatu eta gero. Sorozabal lapurtarrak azken unean lortu du lauko finalerako sailkapena.
Atzelarietan, Thibault Basque izan da onena, guztira lau Slam irabazita: Winter Seriea, Cesta All Star-a, Donibane Lohizuneko Nazioartekoa eta Miarritzeko Urrezko Xistera. Atzean utzi ditu Gorka Sorozabal, Unai Lekerika eta Mikel Mancisidor Manci hurrenez hurren. Atzelari mutrikuarrak ere uda ona egin du eta lehen aldiz, lauko finalera sailkatzea lortu du.
Emakumeetan, Elaia Gogenola, ligako egungo txapelduna eta Arai Lejardi izan dira postu bakoitzeko onenak. Aurreko koadroetan, Maite Ortiz de Mendibil, Ihart Arakistain eta Lur Lejardi sailkatu dira Gogenolaren atzetik. Atzean, berriz, Frida Watkins zumaiarra, Maia Goikoetxea berriatuarra —egungo txapelduna Elaiarekin batera— eta Oaia Otaño mutrikuarra. Lur Lejardi eta Oaia Otañorentzat, beraien lehenengo lauko finala izango da. Emakumeen liga, hamar txapelketak osatu dute, eta pilotari bakoitzak gehienez ere bost Masterretako puntuak batu ahal izan ditu, lauko finalera sailkatzeko.
Bikoteak eta partidak
Lauko finala jokatzeko, sailkapeneko lehen aurrelariak sailkapeneko lehen atzelariarekin osatuko du bikotea. Bigarrenak bigarrenarekin, eta horrela, lau bikoteak osatu arte. Carmelo Balda pilotalekuan, bi finalerdi jokatuko dira —lehen sailkatuak laugarren kontra, eta bigarrenak hirugarrenen aurka—, eta ondoren, finala.
Hona hemen norgehiagoken egitaraua:
- Irailak 14 (19:00). Lehen finalerdiak; Elaia-Arai / Lur-Oaia nesketan, eta Barandika-Basque / Johan-Manci mutiletan.
- Irailak 21 (19:00). Bigarren finalerdiak; Maite-Frida / Ihart-Maia nesketan, eta Erkiaga-Gorka/Urreisti-Lekerika mutiletan.
- Irailak 28 (19:00). Finalak.
