'Donostia oinez' estrategia aurkeztu du udalak, «hiri ibilgarriago, irisgarriago eta bizigarriago lortzeko»
Olatz Yarza Mugikortasun zinegotziak eman ditu 'Donostia oinez' estrategiaren xehetasunak.Donostiako Udala 
Donostiako Udalak Donostia oinez oinezkoentzako estrategia aurkeztu du, gaur goizean. Dokumentu horrek datozen urteetan oinezkoen mugikortasunerako eta gune publikoa hobetzeko udal politikak gidatuko dituzten jarduera ildoak ezartzen ditu. Egitasmoak hiriaren ezaugarri nagusietako bat indartu nahi du: eguneroko joan-etorrien zati handi bat oinez egiteko aukera ematen duen hiri kalitate handia.
“Etapa berri bat da gure hiria mugikortasun eredu jasangarriago, inklusiboago eta osasungarriago baterantz eraldatzeko bidean. Behin garraio publikoaren sistema indartuta, topoaren azpiegiturak ekarri duen iraultzarekin eta lurrazalean izan duen eragin positiboarekin, orain mugikortasunaren fase berri bat dator, eta horren helburu nagusia da oinez ibiltzea eguneroko joan-etorrietarako aukera nagusietako bat izatea”, azaldu du Olatz Yarza Mugikortasuneko zinegotziak.
Gaineratu duenez, estrategia berri honek “auzoen arteko lotura hobetzen lagunduko digu, oztopoak kenduz, pertsonentzako gune publikoa berreskuratuz eta gure kaleen ingurumen kalitatea indartuz, gure hirian ibiltzea aukera erosoa, segurua eta erakargarria izan dadin”.
Ibilbide orri hau Hiri Mugikortasun Planaren helburuekin bat datorrela nabarmendu du Yarzak, “eta ibilgailu pribatuarekiko mendekotasun txikiagoa duen hiri baterantz aurrera egitea ahalbidetuko du, adin guztietarako irisgarriagoa eta etorkizuneko erronka klimatiko eta demografikoei aurre egiteko prestatuagoa izango dena”.
Horrela, estrategiak hiriari buruzko ikuspegi bat planteatzen du, non pertsonek hiri erabakien erdigunea okupatzen duten, irisgarritasuna, bide segurtasuna, ingurumen kalitatea eta auzoen arteko lotura hobetzeko jarduerak bultzatuz, baita bizikidetzarako gune publiko atseginagoak eta erosoagoak sortzeko ere.
Etorkizuneko plan horren aurkezpena gaur bertan hasi den Mugikortasunaren Europako Astearen esparruan egin da. Estrategia udaletxean egin den lan-jardunaldi batean aurkeztu da, eta horretan, Donostiako Udalak dokumentua eta haren ondorioak partekatuko ditu Oinez doazen Hirien Sareko beste euskal udalerri batzuekin. Izan ere, Donostiak joan den urtean egin zuen bat sarearekin.
Kaleak oinezkoentzat bihurtzeaz harago
Donostia Oinez estrategia datozen asteetan onartuko da, jendaurrean ikusgai egoteko epearen ondoren, eta oinezkoen estrategian kontzeptu berri bat sartzen du, planteamendua oinarritzen duena: ibilgarritasuna. Kontzeptu hau hiri plangintzarako ikuspegi bat da, pertsonak hiriaren diseinuaren erdigunean jartzen dituena, eguneroko joan-etorriak modu eroso, seguru, irisgarri eta atseginean oinez egin ahal izateko.
Orain arte, oinezko ibilbideak hobetzeko jarduketak sinplifikatu egin dira herritarren iruditerian, hala nola kaleak eta plazak oinezkoentzat egitea edo ibilgailuen trafikoa murriztea. Hala ere, azken urteotan, ikuspegi integralagoa ematen duen kontzeptu bat nagusitu da, eguneroko joan-etorriak auzoen arteko konexio sare hobeekin oinez egin ahal izatea errazteko, oztopo arkitektonikoak kenduz irisgarritasuna indartzeko, bide segurtasuna areagotzeko, berdegune edo zuhaitz-gune gehiago jartzeko eta kalitatezko gune publikoak sortzeko. Horrela, oinez ibiltzea aukera praktiko eta erakargarri bihurtuko da pertsona gehiagorentzat.
Auzoak lotzeko sarea
Kontzeptu horretatik abiatuta eta hiriaren abiapuntua sakon aztertu ondoren, hura hobetzeko hainbat neurri planteatu dira. Estrategiaren abiapuntua da Donostia erreferentziazko hiria dela oinezkoen mugikortasunari dagokionez: gaur egun, barneko joan-etorrien % 56,7 oinez egiten dira.
Oinarri horren gainean, udalak 76 kilometroko oinezkoentzako sare nagusia finkatzea proposatu du, auzo ibilbide osagarrien beste 51 kilometro handituta, hiriko auzo, ekipamendu eta jarduera eremu nagusiak modu irisgarri eta seguruan lotuko dituen 127 kilometroko sarea eratzeko.
Dokumentuak, gainera, 2032rako helburu zehatzak finkatzen ditu, besteak beste, oinezkoentzako bide irisgarrien %90 lortzea —bereziki adinekoentzat, haurrentzat eta mugikortasun urriko pertsonentzat—, bide segurtasuna indartzea eta hiri ibilbideetan zuhaitzen, bankuen, iturrien edo argiztapenaren eta korridore berdeen presentzia handitzea.
Pertsonentzako gune publikoak
Donostia Oinez, gainera, mugikortasunaren kontzeptua zabaltzen du, gune publikoaren ikuspegi zabalagoa txertatzeko. Estrategiak ingurune bizigarriagoak bultzatzea aurreikusten du ikastetxeen, liburutegien, kirol ekipamenduen, osasun-zentroen, merkatuen eta auzoetako erreferentziazko beste gune batzuen inguruan.
Helburua da leku horiek topaketarako, bizikidetzarako, jolaserako eta atsedenerako gune bihurtzea, komunitate-bizitza indartuz eta hiriko auzo guztietan hurbileko harremanak erraztuz.
