Ikamako sei kidek epailearen aurrean deklaratu dute Donostian egindako ekintza baten harira
Andia kaleko Eusko Jaurlaritzaren ordezkaritzaren aurrean egin dute ekintza EHEk eta Ikamak.Beñat Parra 
Ikama ikasle antolakundeko sei kidek deklaratu egin dute gaur epailearen aurrean, iazko azaroaren 20an Donostian egindako ekintza baten harira. Euskal Herrian Euskaraz (EHE) eta Ibaetako Ikamak jakinarazi dutenez, sei lagunak auzipetuta daude ekintza horren ondorioz.
Azaroaren 20ko ekintza Eusko Jaurlaritzak Donostian duen egoitzan egin zuten. Bi eragileen arabera, Kultura eta Hizkuntza Politikako sailburu Ibone Bengoetxea Otaoleari zuzendutako gutun ofizial bat erregistratzen saiatu ziren. Gutunean, euskararen aldeko hizkuntza politikak indartzeko eta, haien esanetan, “euskararen aurkako oldarraldi judiziala” geldiarazteko neurriak eskatu nahi zituzten.
EHEk eta Ikamak azaldu dutenez, Jaurlaritzaren egoitzako ateak itxita aurkitu zituzten eta ezin izan zuten gutuna erregistratu. Ekintza amaitutzat eman ondoren, Ertzaintza bertaratu zen eta sei lagunak identifikatu zituen.
Ez dute deklaraziorik egin
Gaurko deklarazioetan, auzipetuek ez deklaratzeko eskubidea baliatu dute, bi erakundeek jakinarazi dutenez. Aurrerantzean, Fiskaltzak egin dezakeen zigor eskaeraren eta epaiketa egiteko dataren zain geratuko dira.
Bi eragileek kritikatu egin dute sei kideen aurkako prozesu penala abiarazi izana. Haien ustez, auzia euskararen aldeko jardueren “kriminalizazioaren” adierazgarri da. Era berean, euskararen hizkuntza eskubideak bermatzeko eta euskararen erabilera sustatzeko neurriak hartzeko eskatu diete instituzio publikoei eta arduradun politikoei.
EHEk eta Ikamak adierazi dute euskararen aldeko aldarrikapenekin jarraituko dutela eta auzi judizialak ez dituela beren jarduera etengo.
