Azaroaren 21ean jarriko dute abian Donostiako topoaren pasabidea
Hiriaren erdialdea lurpetik zeharkatuko duen zati berriak 4,2 kilometro izango ditu, Amara, Kontxa-Erdialdea eta Bentaberri geltokiak lotuz.
Susana Garcia Chueca Mugikortasun sailburuaren agerraldia, Bentaberriko geltokian.ETS 
Eusko Jaurlaritzako Mugikortasun Sailak jakinarazi duenez, azaroaren 21ean jarriko da abian Donostiako topoaren lurpeko pasabide berria. “Metroaren maiztasunak izango ditu, zazpi minutu eta erdiz behin, eta ziur nago Donostiak eta Gipuzkoak datozen hamarkadetara begiratzeko merezi dutenaren mailan egongo dela”, adierazi du Susana Garcia Chueca Mugikortasun sailburuak, gaur goizean Bentaberriko geltokian egindako agerraldian.
Euskal Trenbide Sareak (ETS) egindako 4,2 kilometroko zati berri horrek, Amara, Kontxa-Erdialdea eta Bentaberri geltokien artean igarotzen denak, hiriaren erdialdea lurpetik zeharkatuko du. Jaurlaritzak, ETSren bidez, osorik finantzatu du, eta azken ukitu arkitektonikoak ematen eta instalazioekin eta Artzain Onaren ingurua urbanizatzearekin lotutako lanak egiten ari dira.
Garcia Chuecaren arabera, topoak “iraultza” eragingo du lurpean, baina baita gainazalean ere. Horrela, hiriko erdialdeko hainbat kaletan dagoeneko ikusten diren hiri hobekuntzak eta Amarako trenbide zabaltzan liberatuko den azalera ekarri ditu gogora. Gainera, Zaragoza plaza urbanizatzeko lanen lizitazioa iragarri du, 1,4 milioi euroko aurrekontuarekin eta sei hilabeteko gauzatze epearekin.
180 makinista
Aste honetan hasi dira topoaren lurpeko pasabidetik gidatuko duten 180 makinistak trebatzen. Zehazki, Amarako lur gaineko geltokian zaku hondoa, gaur egun trenek errebotatzen duten lekua, kendu duen bi bideko sare honetan jardungo dutenak dira.
Zirkulazio horietan garatuko den trebakuntzaren, ibilaldi zuriak deitzen direnen, helburua da tren barruan erreplikatzea trenbide zerbitzu publiko berria izango dena, baina bidaiaririk gabe, makinistek zati berriaren ezaugarriak benetakoen ahalik eta baldintza antzekoenetan esperimentatu ahal izan ditzaten. Trebakuntza datozen asteotan egingo dute, egun Amarako lur gaineko geltokian amaitzen den zerbitzuarekin bateratu behar delako.
Sailburuak gogoratu du hiru geltoki berriak eta horiek lotzen dituen ibilbideak —Amara, Erdialdea eta Antigua— ahalbidetuko duela topoak geltoki gehiago, maiztasun hobeak —Pasaia eta Añorga artean 7,5 minutu— eta, gaur egun Amaran egiten den trenen erreboterik gabe, sare jarraitu eta eraginkorragoa izatea. “Topo berriak geltoki modernoagoak, jende guztiarentzat irisgarriagoak eta zerbitzu eraginkorra eta fidagarria izango ditu”, gaineratu du Garcia Chuecak.
