Zubietak II. Errebote Eguna ospatuko du urriaren 3ko eta 4ko asteburuan
2023ko Zubietako jaietako errebote partida bat. Zubietako jaiak 
Urriaren 3an eta 4an II. Errebote Eguna ospatuko dute Zubietan, kirol hau ezagutzera eman eta bultzatzeko helburuarekin. Egitaraua larunbatean, urriak 3, abiatuko da 17:00etan, gazteen arteko Joko Garbi partidekin. Hauek amaitutakoan, bertaratzen direnek Joko Garbian jolasteko aukera irekia izango dute; bertan, xextoak eta pilotak probatzeko aukera egongo da, eta nork irakatsi ere izango dute, kirolera hurbildu nahi duen ororentzat.
Arratsaldea borobiltzeko, 19:30ean afari-merienda egingo dute, trikitilariek alaituta. Ondoren, 20:30ean, errebotearen xehetasunetan sakontzeko txanda izango da: Errebotea. Plaza-joko baten muina bideoa proiektatuko dute. Ikus-entzunezko horrek, Zubietako errebote partida baten testuinguruan, jokoa ulertzeko gako nagusiak biltzen ditu. Bideoaren ostean solasaldia irekiko dute, ikusleen zalantzak argitzeko.
Igandean, urriak 4, 10:30ean emango diote jarraipena festari, Enrike Abril txapelketako partida batekin. Partidaz gozatzeaz gain, ikusleentzat esperientzia aberasgarria izango da; izan ere, norgehiagoka ikusi bitartean, jokoari buruzko azalpenak emango dituzte ikusleen artean, horretan arituko direnen eskutik.
