12 orduko musika eskaintza Tabakaleran, musikaren egunean
Gazteak Musikaren Egunaren bigarren edizioa egingo du urriaren 11n Tabakaleran, eta 12 ordu inguruko egitaraua izango du. 11:30etik aurrera, Euskal Herriko hainbat musika taldek eta bakarlarik joko dute Kultura Garaikidearen Nazioarteko Zentroko aretoetan. Besteak beste, Zeatikez, Belako, Tatta, Lukiek, Ane Lukin, Esanezin, Aimarz, XSakara, Kattalin, Nenufarrak, BARRRK, Garazi Esnaola eta Herenegun izango dira programan.
Egitarauan beste hainbat proposamen ere izango dira, tartean Niña Coyote eta Chico Tornado, Libe Kortazar & Jon Basaguren, Apotheke 90, GAR, Mugan, Burutik, Silitia, Nhil, Mr.luken, RTZ eta Indigo. Antolatzaileen arabera, kartelak Euskal Herriko musikaren hainbat estilo eta belaunalditako artistak bilduko ditu, popa, rocka, musika elektronikoa eta proposamen urbano eta alternatiboak barne. Kontzertu bakoitzak ordu erdiko iraupena izango du.
Kontzertuetarako sarrera doakoa izango da, baina aurrez gonbidapena eskuratu beharko da. Emanaldiak blokeka antolatuko dira, eta ikusleek nahi dituzten blokeetarako sarrerak erreserbatu beharko dituzte. Gonbidapenak eta blokeen ordutegiak laster jakinaraziko dira. Ekitaldia Gazteak eta Tabakalerak elkarlanean antolatu dute, eta beste erakunde eta babesle batzuen laguntza ere izango du.
Musikaren Egunean zehar, Gazteak ekitaldiaren jarraipena egingo du Tabakaleratik bertatik. Ainhoa Vitoria eta Liher Larrañagak “Bitan” saio berezia egingo dute, eta bertan artistak elkarrizketatuko dituzte. Kontzertuak zuzenean ikusteko aukera ere egongo da Gaztearen webgunean eta YouTubeko kanalean, eta Gaztearen eta Tabakaleraren sare sozialetan ekitaldiarekin lotutako edukiak argitaratuko dira.
