Tabakalerak ‘Bizitza dokumentatzea’ mintegia antolatu du artxiboaren eta memoriaren inguruan
'KOOPERATIBA' erakusketa, Tabakaleran.Tabakalera 
Hilaren 15etik 18ra bitartean, Tabakalerak Bizitza dokumentatzea mintegia hartuko du. Lau egun horietan, mintegiak urtarrilaren 10era arte Tabakaleran ikusgai dagoen KOOPERATIBA erakusketa zeharkatzen duten kontakizun anonimoak berreskuratuko ditu. Horretarako, egitarauak bi zinema proiekzio, lantegi bat, bisita gidatu bat eta hainbat hitzaldi eskainiko ditu. Mintegiaren abiapuntua Taxio Ardanaz eta Carla Filipe artisten ikerketetan ageri diren askotariko bizi kontakizunak dira. Bi artista hauek dira KOOPERATIBA erakusketaren protagonistak.
Jardueretan parte hartzeko ezinbestekoa da aldez aurretik sarrera erostea edo izena ematea. Programari buruzko informazio osoa Tabakaleraren webgunean dago eskuragarri.
Gonbidatu bereziak eta egitarau oparoa
Mintegiak nazioarteko zein bertako gonbidatu nabarmenak izango ditu: Susan Meiselas, Francis Pisani, Tono Vizcaíno, Susana Lourenço Marques, Taxio Ardanaz eta Angel Calvo Ulloa.
Hilaren 15ean, ostegunarekin, hasiko da egitaraua: Joaquim Jordà zinemagilearen Numax presenta… (1980) filmaren proiekzioak irekiko du mintegia. Saio hau Angel Calvo Ulloa erakusketaren komisarioak aurkeztuko du. Filmak Numax enpresa kataluniarreko langile talde baten borroka eta ekoizpen autogestionatua jasotzen ditu.
Ostiralean, Artxiboa ikerketa-gune gisa lantegia egingo da, artxiboa memoriarako eta eraldaketarako tresna gisa aztertzeko. Lantegiaren ostean, Taxio Ardanazek eta Calvo Ulloak bisita gidatua eskainiko dute erakusketara, eta jarraian solasaldia egongo da Susana Lourenço Marques eta Tono Vizcaíno Estevanekin.
Larunbatean, memoria, irudia eta prozesu kolektiboei buruzko hitzaldiak izango dira. Francis Pisani kazetaria Calvo Ulloarekin mintzatuko da Torre Belaren esperientziari buruz. Ondoren, Susan Meiselas argazkilari estatubatuarrak Nikaraguan, El Salvadorren, Txilen eta Kurdistanen egindako ibilbidea izango du hizpide.
Amaitzeko, igandean, Thomas Harlanen Torre Bela (1975) filma proiektatuko dute. Lan horrek Krabelinen Iraultzaren ondoren Portugalen bultzatutako esperientzia kooperatibo iraultzaile baten goraldia eta gainbehera erakusten ditu.
