Etxebizitzak «langile klasea elkarren artean borrokatzera behartzen» duela salatu du Saretxek, Egiako etxegabetzearen harira
Saretxeren prentsaurreko bat, Egiako etxegabetzearen harira. Xalba Ramirez 
Sei laguneko familia bat etxegabetzekoa ziren Egian gaur, hilak 19, baina kaleratzea bi hilabetez bertan behera uztea lortu zuen Saretxe etxebizitza sindikatuak joan den astean, familiaren zaurgarritasun egoera dela eta. Horren harira, etxejabeak bere egoeraren berri eman du asteburuan El Diario Vasco egunkarian, besteak beste, azalduz etxea “bizitzeko” behar duela eta bera ere egoera zaurgarrian dagoela.
Horrela, Saretxek adierazpen horien inguruko oharra bidali du hedabideetara: “Lehenik eta behin, etxejabearen sufrimendua eta egoera errespetatzen dugu. Egoeraren jakitun izanda, gure helburua gatazkari irtenbide bat topatzea izan da”, nabarmendu dute. Ildo horretatik, Saretxekoek salatu dute “arazoaren muina, eta, beraz, eztabaida, etxebizitzaren gatazkak langile klasea kontrajartzen” duela dela: “Testuinguru honetan, etxejabea bere etxera ezin itzultzea beharra daukanean, edo familia bat kale gorrian geratzea, bidegabekeria da bi kasuetan. Ez gaitezen nahasi, eztabaida ez da nork behar duen gehien etxe hori, baizik eta zergatik ez dagoen etxebizitza bermatuta langile guztiontzat, eta noren errua den hori”.
Era berean, aipaturiko egunkariaren argitalpenak dioenaren parte bat “argitu” nahi izan du Saretxek: “Familiak ez du zorrik. Sententziak kontrakoa esaten duen arren, probidentzian, hau da, ebazpen judizialean argi esaten da etxegabetzearen arrazoia kontratu amaiera dela, eta hala adierazi genuen etxegabetzearen etetearen berri eman genuenean. Argitu nahi dugu, baita ere, kasu honetan ez dela 29/2026 Errege Dekretu-legea aplikatu. Orain, egoera aztertzeko bi hilabete daude”.
Udalaren erantzukizuna
Saretxek argi dauka Donostiako Udalak esku hartu behar duela, egoera konpontzeko: “Nola uste dugu konpondu beharko litzatekeela gatazka hau? Udalari eta gizarte zerbitzuei ardura hartu dezaten eskatuz, eta hala egin genuen prentsaurrekoan. Haiek baitituzte arazo hau konpontzeko edota saihesteko baliabide materialak eta erantzukizun legala”.
Horrela, langile klasea batzera deitu dute: “Etxebizitzaren egoera hain da larria, ezen langile klasea elkarren artean borrokatzera behartzen duen. Langileok ez genuke gure artean borrokatu behar, gutxiago ezinbestekoa zaigun oinarrizko behar batengatik; kontrara, bi pertsona horiek batzea, antolatzea eta komunean duten etsaiaren kontra egitea da gure lana. Alegia, etxebizitzarekin espekulatzen dutenen aurka eta egoera hau betikotzen duten udalen, gobernuen eta administrazioaren aurka”.
Horregatik guztiagatik, alde batetik, udalari eskatu diote “egoera hau konpontzeko neurriak har ditzan; hau da, hilaren 19an etxegabetu behar zuten familiarentzako kalitatezko alternatiba bat ziurtatzea”. Bestetik, azaldu dute sindikatuaren “nahia” dela “etxejabearekin hitz egitea, egoera ongi aztertu ahal izateko”. “Langileok elkarren artean zapaltzeari uzteko garaia da”, gehitu dute.
