Nøgenek agur esango du, hamar urtez Donostiako musikaren parte izan ondoren
Nøgen donostiarrak, artxiboko argazki batean.Mario Lezaun 
Nøgen talde donostiarrak bere ibilbide musikalaren amaiera iragarri du. Urte luzez oholtza gainean aritu ondoren, zirkulua ixteko garaia iritsi dela jakinarazi du taldeak, eta 2027ko urtarrilean emango dio amaiera bere ibilbideari, azken disko batekin eta bira batekin.
Agur mezuan, taldeak atzera begiratu du, hasierako urratsak eta urte hauetan bizitakoak gogora ekarriz. Duela hamar urte baino gehiago hasi ziren musika egiten, Danimarkan, Markel Idigorasek ukulele bat hartu eta “etxetik hain urrun ez sentitzeko”. Han sortu zen, euren hitzetan, gaur egun amaierara iristen ari den abenturaren lehen hazia.
Ordutik, “bidea ez da beti erraza izan”. Nøgenek aitortu du une zailak bizi izan dituela, baina baita oztopoak gainditzeko eta aurrera egiteko indarra aurkitu ere. Urte hauetan guztietan, musika izan dute elkargune, eta oholtza gainean partekatu dituzten uneak taldearen historiaren ezinbesteko atal bihurtu dira. “Horregatik, zirkulua ixtea erabaki dugu”, azaldu dute agur mezuan. Erabakiaren atzean, ordea, ez dago egindako bideari uko egiteko gogorik, baizik eta bizitako guztia bere horretan gordetzeko nahia. Taldeak argi utzi du ez duela iragana ezabatu nahi: “Guk ere ez. Zuek ere ez. Guztia edo ezer ez”.
Kantu bat agurrerako
Agur hau otsailean helduko den azken diskoarekin batera izango da. Disko horretan egongo da, hain zuzen, taldearen ibilbidea apur bat laburtzen duen Onak eta Txarrak kantua, gaur argitaratu dutena plataforma digitaletan.
Agurrak esker onerako tartea ere izan du. Nøgenek bereziki eskertu ditu urte hauetan alboan izan dituen lagunak, jarraitzaileak eta bidelagunak. Haiei guztiei zuzendutako hitzetan, taldeak aitortu du musikak ez dituela soilik kontzertuak eta abestiak utzi, harremanak eta partekatutako bizipenak ere eraiki dituela.
Azken kontzertuak, beraz, ez dira emanaldi soilak izango. Urte hauetan egindako bideari amaiera emateko eta publikoarekin azken aldiz elkartzeko aukera izango da, elkarrekin eraikitakoari agur esateko unea. Hauek dira orain arte iragarritako agur kontzertuak: Errenteriako Lekuonan, otsailaren 20ean; Bilboko Kafe Antzokian, otsailaren 27an; Madrileko Cafe La Palman, Martxoaren 6an; eta Bartzelonako Razzmatazzen, Maiatzaren 1ean.
“Zirkulu itxiek, azken finean, ez dute amaierarik. Hurrengo bueltan ikusiko dugu elkar”, idatzi dute Jokin, Olatz, Alex, Markel eta Anek sinatutako mezuan. Oraingoz, horixe da Nøgenek utzi nahi izan duen azken mezua: eskerrak ematea, bizitakoa ospatzea eta, agurra gorabehera, berriz elkartzeko atea zabalik uztea.
