Insaustik eta Kortajarenak Bentaberrikoa «berri ona» dela nabarmendu dute
Bentaberriko babes ofizialeko etxebizitzetako maizterren protesta.Joseba Parron San Sebastian 
Bentaberriko 510 etxebizitzak eskuratzeko Eusko Jaurlaritzak iragarritako akordioaren balorazioa egin dute Jon Insausti alkateak eta Nerea Kortajarena EH Bilduko legebiltzarkide eta Donostiako alkategaiak. Biek nabarmendu dute “berri ona” dela, baina bakoitzak hainbat ñabardura egin nahi izan ditu.
“Bentaberriko bizilagunek euskal erakundeekiko izan duten pazientzia eta konfiantza eskertu nahi dut. Bestalde, nabarmendu nahi dut Donostiako Udaleko indar politiko guztiek esparru honetan erakutsi dugun batasuna”, adierazi du Insaustik. Horrekin batera, gogoratu du martxoko udalbatzarrean Eusko Jaurlaritzari eskatu ziotela Bentaberriko aferari irtenbide bat emateko, “eta gaurko egunez badugu”. “Horrek argi uzten dugu donostiarrok bat egiten dugunean, gauzak aurrera ateratzen ditugula eta aliantzetan egin behar dugula lana”.
Bestalde, alkateak eskerrak eman dizkio “Eusko Jaurlaritzari, Imanol Pradales lehendakariari eta sailburuari”, Denis Itxasori erreferentzia eginez. “Donostiara irtenbide zehatza eta argia ekarri dute.Niri horrelako funtsekin lan egitea ez zait batere gustatzen, beraz, etxebizitza hauen kontrola eta jabetza lortzea oso ona da donostiarrentzat”, zehaztu du.
Kortajarenak, berriz, Bentaberrin bizi diren 510 familien borroka nabarmendu du: “Aspalditik daramate oso kezkatuta bizi behar izan duten egoerarekin, eta aspalditik dabiltza borrokan. Beraz, zoriontzeko moduko berri bat da, egon zitekeen albisterik onena”. Operazioaren “xehetasunak” jakitean “eztabaidatzeko” aukera egongo dela gehitu du, “adostu dituzten baldintzak jakitea komeni delako”.
Nolanahi ere, gertaturikoaren irakurketa kritikoa ere egin du EH Bilduren alkategaiak: “Gogoratu nahi dugu horrelako egoera batera iritsi garela, urtetan burutu izan diren etxebizitza politika okerrengatik. Hau ez zen sekula gertatu beharko, eta irtenbide hau, erosketarena, askoz ere lehenago hartu zitekeen”. Ildo horretan, esan du EH Bilduk aspaldi proposatu zuela etxebizitza hauek erostea. “Legebiltzarrera 2014an eraman genuen lehen aldiz eskaera hori, eta azkena iragan martxoan, Donostiako osoko bilkurara eta Gasteizko legebiltzarrera”.
