Donostiako hilerriak prest daude Santu Guztien Egunerako
Larraundi kaletik du sarbidea Altzako hilerriak.Beñat Parra 
Donostiako Udalak Polloe, Altza eta Igeldoko hilerrietako garbiketa eta zaintza lanak indartu ditu, azaroaren 1ean Santu Guztien Eguna dela eta hildakoak gogoratzera joango diren bisitariei harrera egiteko. Horrez gain, Udaltzaingoak kontrol lanak egingo ditu hilerrien inguruetan, segurtasuna bermatzeko eta gorabeherak saihesteko.
Polloeko sarrera plazan eta kale nagusietako espaloietan sakoneko garbiketa egin dute. Udalak, halaber, jende pilaketak saihesteko aurreko edo ondorengo egunetan bisitatzea eta garraio publikoa erabiltzea gomendatu du. Polloera 9., 24., 27., 41. eta 42. autobus lineak iristen dira; Altzara, 13., 24., 27., 31. eta 38. lineak; eta Igeldora, 16. linea.
Hilerrien ohiko ordutegia 08:00etatik 20:00etara da apiriletik urrira, eta 08:00etatik 19:00etara azarotik martxora. Polloeko nitxoen eremua, berriz, 08:00etatik 13:30era egongo da zabalik urriaren 27tik 29ra, eta 08:00etatik 18:00etara urriaren 30etik azaroaren 1era. Loreak eta landareak erosteko postuak ere baimendu dituzte hilerrien inguruan, Santu Guztien Egunera arte.
Musika, mezak eta bisita gidatuak
Azaroaren 1ean, 12:00etatik 14:00etara, Afinando silencios ekimena egingo dute Polloen, hildakoak gogoratzeko eta bisitariei musika saioekin laguntzeko. Egun horretan, 13:15ean, meza izango da Polloeko kaperan; azaroaren 2an, berriz, 12:00etan egingo dute beste meza bat Altzako hilerrian.
Polloen bisita gidatuek eta 10 eta 14 urte bitarteko ikasleei zuzendutako Polloeko sekretuak hezkuntza ekimenak ere aurrera jarraituko dute. Gainera, azaroaren 1ean, 19:45ean, Oh My Walk enpresak gaueko bisita berezia antolatuko du, Arimen Egunari lotutako tradizioak ezagutzeko.
Udalak, azkenik, kontuz ibiltzeko eskatu die hilobiak garbitzera doazenei, erorikoak eta bestelako istripuak saihesteko. Polloek panteoiak garbitzeko zerbitzua ere eskaintzen du, bereziki lan horiek egiteko zailtasunak dituzten pertsonentzat.
Zappino kapera, zaharberrituta
Bestalde, Polloeko Zappino kapera zaharberritu dute, jatorrizko itxura berreskuratuz. 1910ean eraikitako kapera neogotikoak kareharri grisezko eta arrosazko elementuak, marmola, burdinazko ate forjatua eta Maumejean Hermanos enpresaren beirateak ditu.
Jarduketak saria jaso zuen ekainean, Hilerri eta Hileta zerbitzu Publikoen Berrikuntzarako Sarien lehen edizioan, hileta-ondare artistikoaren eta arkitektonikoaren kategorian. Epaimahaiak Polloek ondare kultural, artistiko eta arkitektonikoaren kontserbazioan egindako lana nabarmendu zuen.
