Martuteneko bizilagunak, lau urte Dbusen zerbitzua hobetzeko zain
Sarroeta auzo elkarteak deituta, joan den astean, 26 lineako autobusa auzoan hartu, eta Bulebarrera joan ziren Martuteneko bizilagunak, protesta egitera. 120 erabiltzaile inguruk parte hartu zuten mobilizazioan. Jon Insausti alkateak dio bizilagunen eskaerei erantzun bat ematen saiatuko dela.
Martuteneko bizilagunen protesta Bulebarrean, pasa den astean.Sarroeta auzo elkartea 
Lau kilometro pasa daude Martutenetik Donostiako Bulebarrera. Distantzia hori egiteko, Dbusen 26 lineak 35-45 minutu behar ditu, zazpi auzo eta hogei geltoki igarota. Denbora hori gutxitzea eta zerbitzua hobetzea nahi dute, besteak beste, Martuteneko Dbusen erabiltzaileek. Horregatik, joan den ostegunean, 26 lineako autobus batean sartu eta Bulebarreraino joan ziren protesta egitera, aspalditik egiten ari diren aldarrikapenak kalera eramateko.
Sarroeta auzo elkarteak deituriko mobilizazioaren 120 bat lagunek bat egin zuten. Martuteneko Larrunmendi geltokian igo ziren autobusera, eta ordu erdi luze geroago iritsi ziren Bulebarrera. Jarraian, elkarretaratzea egin zuten Bulebarreko geltokiaren aurrean, eta agerraldia, Elkano kalean. «26 linearen murrizketak 2023an hasi ziren. Ordurako, linea horren zerbitzua ez zen nahikoa. Lau urte daramatzagu hobekuntzak eskatzen, lau urte, eta udalaren partetik ezezkoak eta murrizketa gehiago baino ez ditugu jaso», salatu zuten auzo elkarteko ordezkariek.
Martuteneko erabiltzaileen eskaerak baztertzeko, Olatz Yarza Mugikortasun zinegotziak Dbus «defizitarioa» dela adierazi dio hainbatetan auzo elkarteari. «Nola jo daiteke zerbitzu publiko bat defizitariotzat? Nola uka daiteke oinarrizko premia bat onura ekonomikorik ekartzen ez duelako? Imajinatzen duzue osasun sailburua minbiziaren tratamendua ukatzen, defizitarioa delako?», galdegin zuten auzotarrek. «Gure hiriaren errealitatea honako hau da: periferiako auzoetan batez besteko errentarik txikiena dugu, eta oso zerbitzu gutxi: ez dugu anbulatoriorik, ez dugu kiroldegirik, ez eta kultur etxerik edo bestelako aisialdirik ere, hala nola antzokiak, zinemak eta abar. Beraz, auzo hauetan mugikortasun eraginkorra beharrezkoa da hirian ekitatea eta gizarte kohesioa bermatzeko», gaineratu zuten.
Dbusen erabiltzaile diren Martuteneko bizilagunek «ia ordubete» galtzen dute egunero, «lau kilometro eskas dituen hogei geltokiko bidaia egiteko». Horrekin batera, gogorarazi zuten auzoak ez duela topo zerbitzurik eta Renferen maiztasunak «oso murriztuta» daudela trenbidean egiten ari diren lanengatik.
Martuteneko bizilagunak, auzoko Larrunmendi geralekuan.Sarroeta auzo elkartea
Hobekuntzak
Bizi duten egoeraren aurrean, eta auzokideen artean egindako batzar ugariren ostean, «zerbitzu onartezina eta lotsagarria» hobetzeko eskaera egin dute Martutenekoek. Bost lehentasun ezarri dituzte: «Maiztasunak hobetzea, bidaia denboren murrizketa, gaueko eta goizeko zerbitzuak zabaltzea, linea Etxarrieneraino luzatzea eta ospitaleekin loturiko zuzeneko autobusa ezartzea (31 linea)».
Martutenek eta Txomiñeneak «eskubideak» dituztela aldarrikatu dute: «Errespetatzeko eskatzen dugu». Auzo «biziak» direla nabarmendu dute, «gero eta erabiltzaile gehiago» dituztenak, Dbusen memoriak dioen moduan: «Gainera, Urumearen ibar osoan are gehiago hazteko aurreikuspenarekin».
Auzo elkartearen arabera, «ezin da gure auzoen etorkizuna planifikatu, etxebizitza berriak eraikiz eta biztanleria handituz, bertan duintasunez bizitzeko beharrezkoak diren zerbitzu publikoak bermatu gabe»: «Gure auzoak ezin dira hiriaren hirigintza interesetarako erabili, bizilagunak garraio publiko gutxiegi izatera kondenatzen diren bitartean. Ez gara bigarren mailako herritarrak: Donostiako gainerakoen eskubide berak ditugu». Horregatik, «konponbide, inbertsio eta konpromiso zehatzak» eskatu dituzte: «Martutenek eta Txominek Dbus duin bat merezi dute, beren beharrak asetzen dituenak! Ez gara geldituko, konponbideak orain iritsi behar dira».
«Autobusa ez badabil bere orduan, auzoen konexiorako ezinbestekoa dena, begiratu beharko dugu», aitortu zuen alkateak
«Hobetu beharreko errealitate bat»
Jon Insausti alkateak, kazetariek galdetuta, Martuteneko bizilagunen aldarrikapenen inguruan hitz egin du aste honetan, asteartero eman ohi duen prentsaurrekoan. Hain zuzen ere, adierazi zuen «hobetu beharreko errealitate bat» erakusten duela martutenetarren egoerak.
«Autobusa ez badabil bere orduan, auzoen konexiorako ezinbestekoa dena, begiratu beharko dugu», aitortu zuen alkateak. Horrekin batera, autobus linea asko «tentsioan» dabiltzala esan zuen, hainbat arrazoirengatik: «Batetik, eta zorionez, garraio publikoaren erabilera handiagoa delako. Bestetik, ordea, hiriko abiadura gutxitu dugunez, autobusen bidaiak zertxobait moteldu dira».
Martuteneko herritarren eta auzo elkartearen kexen aurrean, Insaustik onartu zuen «aitzakiek» ez dutela balio, eta arazoari aurre egin behar diotela. «Auzotarren kezka jaso dut eta erantzun bat ematea espero dut», gaineratu zuen. Bukatzeko, Martutene ere Donostiako auzo bat dela nabarmendu zuen, «Erdialdea, Aiete eta Intxaurrondo auzoak diren modu berean».
