Martuteneko espetxea eraistea eta lursail horretan 400 etxe inguru eraikitzea adostu dute Madrilen
Esparruaren eraldaketak, hasiera batean, 14,5 milioi euroko estimazioa du, baina urbanizazio proiektua idaztean zehaztu beharko da.
Jon Insausti, Isabel Rodriguez eta Denis Itxaso, Madrilen izandako bileran.Donostiako Udala 
Donostiako Udalak, Eusko Jaurlaritzak eta Espainiako Etxebizitza eta Hiri Agenda ministerioak Txomin II eremuko garapenari buruz hitz egiteko bilera egin dute asteazken arratsaldean, Madrilen. Jon Insausti alkateak, Denis Itxaso Etxebizitza sailburuak eta Isabel Rodriguez Etxebizitza ministroak parte hartu dute bilkuran.
Martuteneko espetxe zaharraren eremuan 400 etxebizitza eta zuzkidura apartamentu inguru eraikitzea adostu dute, “etxebizitza babestuari eta eskuragarriari” lehentasuna emanez. Bileran hiru lan ildo zehaztu dituzte: espetxe zaharra eraistea, udal lursailak Eusko Jaurlaritzari lagatzea eta Visesa eta Casa 47 entitateen sustapenak koordinatuko dituen zein urbanizazioa aginduko duen hitzarmena prestatzea. Urrats horiei esker, Txomiñeneko bigarren faseak aurrera egingo duela nabarmendu dute, “lurzoru horiek auzoan integratuz”.
Espetxearen eraisketa
Lehenik eta behin, sailburuak Visesak egindako eraisketa proiektu teknikoa eman dio ministroari. Aurreikuspenen arabera, Casa 47 Espainiako etxebizitza entitate publikoak eraisketa bultzatu eta egonkortuko du, behin beharrezko jarduketa administratiboak eta teknikoak osatu ostean. Aurrekontua 3,6 milioi eurokoa da, BEZik gabe. Proiektua idazteko ordainsariak, Aranzadiko azterketa historikoa barne, 118.470 eurokoak dira, BEZik gabe. Guztira, beraz, 3,7 milioi euroko kostua aurreikusi dute.
Eraisketari esker, espetxe zaharraren lursailak berreskuratuko dira eta bizitegi garapenean barne hartu. Gainera, proiektuak Aranzadi Zientzia Elkartearen ikerketa ere jasotzen du. Kartzelak frankismoan eta trantsizioan bete zuen errepresio rola ikertu dute. Lan horretatik abiatuta, barruti zaharraren elementu arkitektoniko adierazgarriren bati eustea edo jasandako errepresioa gogoraraziko duen plaka edo panel oroigarri bat jartzea aurreikusi dute, betiere esparruaren etorkizuneko hirigintza garapenean integratuta. Horrela, eremuak leku horren memoria historikoa ere kontuan hartuko luke.
Lurzoru publikoa
Txomin II bizitegi esparruan dauden udal lur guztiak Eusko Jaurlaritzari laga zaizkiola berresteko balio izan du bilerak. Lursail horiek esparruaren azaleraren bi heren dira, gutxi gorabehera. Gainerako herena estatuaren titulartasuneko espetxe zaharraren lursailei dagokie.
Lurzoru ekarpen horrek Visesaren eta Casa 47 entitatearen baterako jarduketa artikulatzea ahalbidetuko du. Bakoitzak dagozkion partzelak eta aprobetxamenduak garauko ditu, hirigintza tresnen eta formalizatzen diren akordioen arabera. Gutxi gorabehera, 400 etxebizitza eta bizitokiren aurreikuspenarekin, Donostiako etxebizitza eskaintza babestua eta eskuragarria handitu ahalko da.
Udalaren hurrengo pausoa izango da Casa 47 entitatearekin batera landu duen partzelen banaketaren proiektua onartzea. Udalak datorren astearteko, hilaren 10eko, Tokiko Gobernu Batzarrera eramango du hasierako onarpena emateko. Une horretatik aurrera, partzelak Jaurlaritzarekin negoziatzeko prozesuari ekingo dio, udal lurzoruen lagapena zehazteko eta bizitegi garapena gauzatzeko.
14,5 milioi euroko estimazioa
Esparruaren urbanizazioak eta eraldaketak 14,5 milioi euro inguruko estimazioa du. Zenbatekoa ez dago itxita, urbanizazio proiektua idaztean zehaztu beharko baita. Aurreikuspenaren arabera, urbanizazio obra orokorrak 7,5 milioi euro inguruko zenbatekoa izango du, eta elektrizitate harguneak, berriz, 350.000 euro ingurukoa. Horrez gain, esparruak 1,5 milioi euro inguruko karga jasan beharko du, Espartxoko zubiaren eta Ibai parkearen kostuaren herena, gutxi gorabehera.
Estimazio orokorrak espetxe zaharraren eraisketa eta Kristobaldegiko obrak ere barne hartzen ditu. Azken obra horien irismena eta balorazioa, eta partiden eguneratzea zein homogeneizazioa, eragiketaren aurrekontua itxi baino lehen zehaztu beharko dira. Horri esker, etorkizuneko partzelek sarbideak, zerbitzu sareak eta espazio publikoak izango dituzte.
Erantzukizunak eta kostuak
Hiru administrazioek ekin diote esparrua kudeatzeko eta gauzatzeko eredua zehartuko duen lankidetza hitzarmena prestatzeari. Dokumentuak entitate bakoitzaren erantzukizunak, hirigintza kargen banaketa, ekarpen ekonomikoak eta udalaren, Visesaren eta Casa 47 entitatearen arteko koordinazio mekanismoak ezarri beharko ditu.
