Protoi terapiarako makinaria nagusia instalatu dute dagoeneko Donostian
Donostiako protoi terapia unitateak beste urrats bat eman du 2028an lehen pazienteak artatzeko
Protoi terapia egiteko puntako makinaren instalazioa, onkologikoan.Irekia 
Donostiako protoi terapia unitatearen eraikuntzak beste mugarri bat bete du gantrya edo tratamendu beso robotikoa instalatuta. 90 tonako pisua, 10 metroko luzera eta 10 metroko diametroa dituen ekipamendu horrek pazientearen inguruan biratu eta tumoreari protoi izpiak hainbat angelutatik zehaztasun milimetrikoz aplikatzeko aukera emango du. Azpiegitura Onkologikoaren eta Donostiako Unibertsitate Ospitalearen ondoan eraikitzen ari dira, eta Osakidetzak 61,3 milioi euroko inbertsioa egin du dagoeneko.
Gantrya instalatzea funtsezko urratsa da unitatearen garapenean. Lau solairu eta 8.000 metro karratu baino gehiagoko eraikinak protoi terapia sistema hartuko du, eta, fase hori amaituta, tratamendu bunkerraren itxiera egingo dute hormigoi armatuarekin. Ondoren, ziklotroiaren eta gainerako ekipamenduaren integrazio teknologikoarekin, muntaketarekin eta segurtasun eta dosimetria probekin jarraituko dute.
Osakidetzaren aurreikuspenen arabera, 2027an egingo dituzte kalibrazioak eta funtzionamendu proba klinikoak, eta unitatea 2028aren hasieran hasiko da lehen pazienteak artatzen.
Zer da protoi terapia?
Protoi terapia erradioterapiaren modalitate aurreratu bat da, protoiak erabiltzen dituena tumoreak tratatzeko, inguruko ehun osasuntsuei ahalik eta kalte txikiena eraginda. Bereziki erabilgarria izan daiteke haurren minbiziaren tratamenduan eta garuna, bizkarrezur muina edo nerbio optikoak bezalako egitura sentikorretatik gertu dauden tumore konplexuetan. Teknologia horri esker, tratamenduaren albo ondorioak eta epe luzeko ondorioak murrizteko aukera dago. Osakidetzaren arabera, munduan mota horretako 140 bat makina baino ez daude.
Instalazio berriak arreta onkologiko espezializatua indartuko du Donostian eta EAE osoan, eta pazienteek tratamendu aurreratu hori jasotzeko aukera izango dute. Horretarako, Osakidetza profesional espezializatuen taldeak prestatzen ari da: mediku onkologoak, erradiofisikariak, erradioterapiako teknikariak eta erizaintzako zein anestesiako langileak, besteak beste.
Osakidetzak azpiegitura estrategikotzat jo du Donostian eraikitzen ari den unitatea, eta berrikuntzaren eta teknologia aurreratuaren aldeko apustuaren barruan kokatu du. Gantryaren instalazioak proiektua aurrera doala erakusten duen arren, oraindik muntaketa, kalibrazioa, proba teknikoak eta beharrezko baimenak lortu beharko dira pazienteak artatzen hasi aurretik. Egutegia betetzen bada, Donostia munduko leku aurreratuenetako bat bihurtuko da protoi terapia bidezko tratamendu onkologiko aurreratuan 2028tik aurrera.
