Abuztuko Txoroskopoa
2026ko Aste Nagusiko su artifizialak.Egoitz Aldanondo 
Aquarius: urtarrilaren 20tik otsailaren 18ra.
Aquarius, uda gorabeheratsua izaten ari zara, adoregabetuta zaude erabat. Eskerrak Txoroskopoaren irakurle nekaezina zarela, badugu eta zuretzat espresuki sorturiko irtenbidea: funanbulismoa. Agian, benetako soka batean orekari eusteak irakatsiko dizu ezer.
Piscis: otsailaren 19tik martxoaren 20ra.
Izarrei begira egoteko joera ez da ez ona, ez txarra, printzipioz. Adibidez, udako oporretan zehar lanari hain maitagarriki iskin egiteko duzun abileziak, zeharo txundituta utzi gaitu. Eklipseari begira ibili gara eta esan digu irailean aro berria hasiko dela. Jaitsi izarretatik, izan ohi bezain maitagarria eta heldu gogor datorrenari.
Aries: martxoaren 21etik apirilaren 19ra.
Uda honetan suz beterik zabiltza, baina ez dakigu sua pasioaren edo eguzkitan gehiegi egotearen ondorio den. Dena den, zure erabaki zentzudun guztiak uztailean itsasoan galdu dituzula dirudi. Ez kezkatu, irailak badakar bueltatzeko aukera. Oraingoz, eman aftersun pixka bat eta pentsatu bi aldiz hitz egin aurretik.
Taurus: apirilaren 20tik maiatzaren 20ra.
Zure burugogorkeriak mugak gainditu ditu eta udan zehar behin baino gehiagotan harrizko estatua batekin nahastu zaituzte. Ez zaitez bigundu, ordea, pentsa norbaitekin zaurgarri izan ahal izatea zenbateraino den beldurgarria. Izarrek diote irailean aldaketa bat datorrela. Zuretzat, noski, aldaketa hori kobazulotik ateratzea izango da.
Gemini: maiatzaren 21etik ekainaren 22ra.
Sentikor zabiltza eta uda honetan edozerk eragin dizu negar egiteko gogoa: film batek, abesti batek, garagardo epel batek… Zure bihotz erraldoia zaindu beharko zenuke, baina ez hainbeste, bestela ez duzu etxetik ateratzeko ausardiarik izango. Prestatu hondartzarako trasteak, fusionatu itsasoarekin eta ireki bihotza.
Cancer: ekainaren 22tik uztailaren 22ra.
Bi pertsona bizi dira zure barruan eta udan biak oporretan joan dira, zu bakarrik utzita. Horregatik ibili zara hain galduta azken asteotan. Komunikazioaren dohain izpirik ez uda honetan, zin dagizut, inork ez du ulertu zertaz ari zinen. Laster, berriz, hitz egiteko aukera izango duzu. Saiatu, mesedez, zintzoa izaten.
Leo: uztailaren 23tik abuztuaren 22ra.
Uda zuretzat egina dagoela pentsatzen duzu eta, egia esan, udako eguzkiak baino distira gehiago egiten du zure egoak. Zure ingurukoek dagoeneko ezin dute zure abentura guztien berri gehiago jasan, baina zuk jarraitu lasai, inork ez baitizu oraindik ezer esan. Hurrengoan, saiatu gainerakoak entzuten bidean.
Virgo: abuztuaren 23tik irailaren 22ra.
Dena kontrolpean edukitzeko duzun obsesioa ez da osasungarria, baina gutxienez zure oporretako maleta alfabetikoki antolatuta izango duzu. Uda honetan, plan guztiak milimetrora prestatu dituzu, eta, noski, ezer ez da planifikatu moduan atera. Izarrek atseden hartzeko eskatzen dizute. Ez dakigu nola egingo duzun, baina saiatu behintzat.
Libra: irailaren 23tik urriaren 22ra.
Erabakiak hartzeko zure ezintasuna oso dibertigarria iruditzen zaigu guri, baina nahiko nekagarria da zure ingurukoentzat. Udan zehar hamazazpi aldiz pentsatu duzu hondartzara joan ala mendira joan, eta azkenean etxean geratu zara. Aukera berriak datoz, oraingoan, mesedez, aukeratu bat.
Escorpius: urriaren 23tik azaroaren 21era.
Zure begirada misteriotsuak uda osoa pasa du ingurukoen asmoak aztertzen, inork ezer arrarorik egin ez badu ere. Susmoak dituzu, eta arrazoirik gabe, gainera. Agian, ez dira bizkarretik labankadaka ari; agian, besterik gabe, ez dizute whatsappa erantzun. Irailean, konfiantza pixka bat hartzea komeni zaizu. Edo ez, eutsi paranoiari.
Sagitarius: azaroaren 22tik abenduaren 21era.
Abentura bila joan zara udan eta, zorionez, abenturak ez zaitu aurkitu. Zure bidaietako argazki kopurua jada ez da inoren begien tamainakoa eta, hala ere, gehiago igoko dituzu. Izarrek mugitzeko eskatzen dizute, baina ez dakite jada non zauden. Non daude zure etxeko giltzak?
Capricornius: abenduaren 22tik urtarrilaren 19ra.
Lanari hain gogor heldu diozu uda honetan… Oporrak ere Excel batean antolatu dituzu, ezta? Atseden hartzea ez omen dago zure planetan, baina gorputzak noizbait protesta egingo du. Ez ezazu dena lan bihurtu, mesedez, bestela, zure nagusiak ere oporrak hartzera behartuko zaitu.
Zapaburius: otsailaren 29tik 31ra.
Irakasleek oporren beharra dutela esaten dutenean bezalaxe begiratuko zaitu jende andanak datozen asteetan: bekain bat altxatuta eta «uf, ez, hau berriro ez» batekin buruan. Zuk, baina, egin kasu zure senari eta atera barruan duzun hori. Bakoitzak bere beharrak eta nahiak ditu. Eta zuk bidegorriak gorriak izatea nahi duzu. Eta kitto.
