Iraileko Txoroskopoa

2026/09/23

Aquarius: urtarrilaren 20tik otsailaren 18ra.

Iraila da eta bueltaka zabiltza. Zurriolan eseri eta bizitzari buruz pentsatzen eman dituzu hiru ordu, eta ondorio bakarra atera duzu: hotz egiten duela. Zinemaldira joateko asmoa duzu, baina ez dakizu zer ikusi, norekin joan edo zer jantzi. Ez kezkatu: jarri ilaran, sarreraren bat lortuko duzu.

Piscis: otsailaren 19tik martxoaren 20ra.

Iraila zuretzat beti da hasiera berrien garaia, baina oraingoan dramatizatzen ari zara. Aktorea izango bazina bezala bizi duzu dena: euria, begirada galduak, paseo luzeak eta kafe bat eskuan (kafearena, zergatik?). Porrontxo jaietan, ordea, zure bizitza guztia komedia bihurtu da. Atera kalera, dantzatu eta utzi metaforak alde batera.

Aries: martxoaren 21etik apirilaren 19ra.

Zure energia handia duzu irail honetan, eskatu behar dizut pixka bat lasaitzeko. Zinemaldian sartzeko ilara ikusi eta korrika joan zara kexatzera, munduko estreinaldirik garrantzitsuena galduko bazenu bezala. Ez zenekien zein pelikula ikusi nahi zenuen ere. Porrontxoetan aukera berri bat izan duzu. Mesedez, ez saiatu txosna osoa zure erritmora dantzarazten.

Taurus: apirilaren 20tik maiatzaren 20ra.

Norbaitek esan dizu film bat ez zaiola gustatu eta hiru orduko eztabaidan sartu zara, zuk ikusi ere egin ez duzun film bati buruz. Intxaurrondo Zaharreko jaietan ere zure iritzia gogotik eman zenuen, inork eskatu ez bazizun ere. Izarrek diote garaia dela malgutasuna lantzeko. Edo, behintzat, besteek ere arrazoia izan dezaketela onartzeko.

Gemini: maiatzaren 21etik ekainaren 22ra.

Zinemaldian pelikula bat aukeratu behar duzu eta dagoeneko hamazazpi kritika irakurri dituzu, hiru trailer ikusi eta lau lagunei galdetu diezu. Azkenean, sarrerarik gabe geratuko zara. Bizitzan aukera errazagoak izango dituzu: joan ala ez joan. Ez pentsatu gehiegi. Joan. Edo ez. Baina, mesedez, erabaki zerbait.

Cancer: ekainaren 22tik uztailaren 22ra.

Ezin da sutarako egurra eta negurako itzala izan, Cancer. Ez egitea eta ez egiteagatik dituzun ondorioen ardura besterentzea ez dira bateragarriak. Gauzak, gehienetan, ez dira ausaz eta halabeharrez gertatzen. Beraz, hartu dagokizun ardura, eta utzi eginbeharrak atzeratzeari.

Leo: uztailaren 23tik abuztuaren 22ra.

Ez dakizu non egon nahi duzun. Plan bat baino gehiago egitea gustatzen zaizu, baina, azkenean, denetara berandu iristen zara. Zure bizitzak film baten trailerra dirudi: zati interesgarrienak agertzen dira, baina inork ez du ezer ulertu. Aukeratu leku bat eta geratu bertan gutxienez hogei minutuz. Erronka.

Virgo: abuztuaren 23tik irailaren 22ra.

Irailean, Donostia osoa zeharkatu duzu abentura baten bila. Porrontxoetan bukatu duzu gaua, inork ez dakiela nola. Zure mugikorrak 4.000 argazki izango ditu, eta, horietatik, 3.997 lausotuta egongo dira. Izarrek etxera bueltatzeko eskatzen dizute. Zuk, noski, “bai, banoa” esango duzu, baina, ez, ez zoaz.

Libra: irailaren 23tik urriaren 22ra.

Ikasturte hasiera hau azken urteetan zailena egiten ari zaizu, Libra. Pisua arintzea dagokizu datozen hilabeteetan: azken 40 urteen hausnarketa egitea, eta unerik esanguratsuenak belusezko kutxa batean gordetzea. Zuk ikusi kutxa emozionala edo fisikoa den, baina ez eraman zurekin lekua kendu baino egiten ez dizun hori.

Escorpius: urriaren 23tik azaroaren 21era.

Beldur berriak identifikatu eta aurre egiteko estrategiak bilatzeko uda izan duzu, Escorpius. Egia esan, zorionak, jauresteko moduko imajinazioa izan duzu, eta uholde ziruditen olatuetan surf egitera heldu zara. Ea udazkenerako zein denbora-pasarekin harritzen duzun ingurua.

Sagitarius: azaroaren 22tik abenduaren 21era.

Sinetsita zeunden lo faltara eta eskas maitatua izatera kondenatu zintuztela, Sagitarius, baina eskerrak fokuek beste nonbaitetik argiztatu zaituzten eta sirena kantuei aurre egiteko beste tresna bildu duzun. Gauaren ondoren dator eguna, eta zureak ez du eklipse itxurarik.

Capricornius: abenduaren 22tik urtarrilaren 19ra.

Laissez-faire-a hartu duzu irailerako bizimoduaren oinarri eta ez zara eguraldia begiratzen ere jarri. Berez, de la ostia dago zure buruari eta ingurukoei sinestaraztea etortzen den horri patxadaz eta jarioari jarraika erantzuten diozula, baina ez da egia, maitia. Ondokoak antolatu dizu hilabetea.

Zapaburius: otsailaren 29tik 31ra.

Ojokuidau, Zapaburius. Hileta bat zen, bai. Solemnitatea eta protokoloa behar zituen. Biziki sentitzen dut, baina sudurhandiek erabat engainatu zaituzte. Eta hasiera besterik ez da izan. Plaza Haundin badakizu noiz sartzen zaren, baina irteerak zailak dira topatzen.