Maiatzeko Txoroskopoa
2026ko Txanpontxoren jaitsierako irudia.Maitane Aldanondo 
Aquarius:
Urtarrilaren 20tik otsailaren 18ra.
Rodrigo Cuevasen kontzertutik biziberrituta atera zara. Batzuetan, Donostia Mundu Zoriontsu horretatik urruti dagoen arren, horrelakoek esperantza pizten dizute. Maiatzetik aurrera, irudikatu Donostia zoriontsu bat: egunero eguzkia ateratzen da eta denok gara marikak. #xardineru
Zure kanta: Un Mundo Feliz, Rodrigo Cuevas.
Piscis:
Otsailaren 19tik martxoaren 20ra.
Sardina bat… Bi sardina… Elkartu ziren… Sardiñerrian! Gauza ederra dira militantzia eta militanteak, ezta? Merezi zenuten ospakizuna. Esaera berri bat proposatuko dizut: larunbatean a txi-txi-txi-txi-txi-txi ua-ua eta astelehenean a ua-ua-ua-ua-ua-ua txi-txi. #fulanabadagobai
Zure kanta: Da Me, Bad Gyal.
Zapaburius:
Otsailaren 29tik 31ra.
Maiatzaren amaierak zure aroa iragartzen du: AUZOETAKO FESTAK. Behin Txanpontxoak eta Morlanskoak pasatuta, eta ekaineko itzuliari ekin aurretik, gorputza prestatzea gomendatzen dizut, gutxieneko entrenamendu bat: eman izena Amara Berriko krosean. #gaurkorribiharoskorri
Zure kanta: Arnasestuka, Skakeitan.
Aries:
Martxoaren 21etik apirilaren 19ra.
Badirudi, eguna luzatu izanaren aitzakian, hilezkorra zarela erabaki duzula. Argi ordu gehiago izateak sekulako energia eman dizu, manialdian zaude, izaki atmosferikoa zara orain. Maiatza denak emanda pasatu duzu, zer ez duzu egingo ekainean. #atertu
Zure kanta: Goazen, Hemendik At.
Taurus:
Apirilaren 20tik maiatzaren 20ra.
Urano Taurustik Geminira itzuli da, beraz, Taurusek 2018an hasitako zazpi urteko zikloa itxi egin da. Zazpi urteko desegonkortasuna ez da ahuntzaren gauerdiko eztula. Gozatu orain datorkizun lautada. #aurrera
Zure kanta: Denbora Aurrera Doie, The Uskis.
Gemini:
Maiatzaren 21etik ekainaren 22ra.
Sakelakoan, mikrouhin labean, kaleko termometroetan, markesinetan, farmazietan, autoan eta eskumuturrean izan duzu ordua begiratu, eta berandu zoazelako larritzeko aukera. Baina ez da pasatu. Nahikoa duzu. #geldotamantsoa
Zure kanta: Bai bai bai, Subsistak and The Aggromondarrak.
Cancer:
Ekainaren 22tik uztailaren 22ra.
Mendi lasterketak dira zure obsesio berria, biziyua. Maratoi erdiak maratoi t’erdi noiz bihurtuko esperoan. Bizitzak beste tankera bat hartzen du zeure buruari helburu bat jartzen diozun aldiro. Produktibitatearen jonkia zara. Zuk beti horrela bizi behar duzu? #stopwaitaminute
Zure kanta: Galdurikan Nago, Tapia ta Leturia.
Leo:
Uztailaren 23tik abuztuaren 22ra.
Leo, besteok bezainbeste maite dituzu oporrak eta uda amaierako aste horiekin zerbait egiteko gogoz zaude; are, ingurukoak engai(n)atzen saiatu zara. Baina, maitia, ez dira bakarrik antolatuko. #ekinbehingoagatik
Zure kanta: Hik lan eta nik jai (Txekor remix), Txekor DJ-a.
Virgo:
Abuztuaren 23tik irailaren 22ra.
Muganen kontzertutik malenkoniatsu atera zara, burua galderaz beterik. Antzoki Zaharrean egon zinen azken aldiaz gogoratu zara, amestu duzu Donostiako antzokiak benetan publikoak eta irisgarriak balira egingo zenituzkeen gauzekin. Hasi gauza horiek eraikitzen, azpiegitura borroka da. #egurra
Zure kanta: Bizitza ozen denean, Mugan.
Libra:
Irailaren 23tik urriaren 22ra.
Libra, Libra, Libra. Ni ere ados nago zure terapeutarekin: burua okupatua mantentzeak eta ezohiko planak egiteak ezinegon hori arinduko dizu. Hala ere, terapeutak akaso ez daki, baina dirua finitua da. Deeeeena ezingo duzu. #kontxadazuremaldivak
Zure kanta: Dena aldatzen da, Nok daki.
Escorpius:
Urriaren 23tik azaroaren 21era.
Apaiza elurretan baino nabarmenagoa da gustuko zaituela, Escorpius. Eta ez dizut nik esan behar gainontzeko guztiek jada esan badizute. Batzuetan, ingurura begiratu besterik ez dago, eta begiak adi izan. #begiakzorrotzbihotzazabal
Zure kanta: Lau begi eder, TOC eta Mirua.
Sagitarius:
Azaroaren 22tik abenduaren 21era.
Sagitarius, lasai, astroek argi adierazi dute non jarri behar dituzun energiak. Donostia eta ingurua hertsiak zaizkizu aspaldian eta ez da kasualitatea. Harago jo beharra duzu: Nafarroa izango da zure Meka. #bilatuzurepiporra
Zure kanta: Begietara elkarri begira, Duenak Azer Piper.
Capricornius:
Abenduaren 22tik urtarrilaren 19ra.
Tematia eta koherentea zara, Capricornius, eta ingurukoek eskertu eta miresten dute hori. Gainontzeko gauzen tankeran, baina, hau ere tamainan egitea komeni. Ez da ezer gertatuko noiz edo noiz arrazoia zu ez zaren norbaiti ematen badiozu (edo arrazoi duela antzezten baduzu). #aharietaari
Zure kanta: Eternitatea eta beste egun bat, Gari.
