Urriko Txoroskopoa

2026/10/22

Aquarius: urtarrilaren 20tik otsailaren 18ra.

Aquarius, Aquarius, Aquarius, urrian begiak argi eta seinaleei so egon behar duzu: zita bat izatea proposatuko dizute. ZITA BAT. Bisigu tripetan ikusi dut aspaldi dela halakorik ez duzula, baina hau ongi joango dela ere bazioten.

Piscis: otsailaren 19tik martxoaren 20ra.

Behobia gora, Behobia behera, besterik ez duzu. Ederra lata ematen ari zarena. Eskerrak korrika bakarrik egiten duzun eta ez zaren Apalategik edo Oyshok antolatutako Korrikafest horietako batean entrenatzen ari. Hori zure alde, baina ez dago dena bakarrik egiteko beharrik.

Aries: martxoaren 21etik apirilaren 19ra.

Urria hasi da eta dagoeneko hiru plan antolatu dituzu, bi eztabaidatan sartu zara eta laugarren bati ekiteko zorian zaude. Lasai, Aries, hilabeteak 31 egun ditu. Mesedez, utzi tarte bat inprobisazioari.

Taurus: apirilaren 20tik maiatzaren 20ra.

Asteburua antolatzeko hamalau aukera dituzu mahai gainean, eta oraindik ez dakizu mendira joan, hondartzatik paseatu, herri batera hurbildu edo etxean geratu. Eguraldiaren iragarpena begiratu duzu. Euria. Ondo baino hobeto dakizu zer esan nahi duen horrek: perretxikotara.

Gemini: maiatzaren 21etik ekainaren 22ra.

Zinemaldian pelikula bat aukeratu behar duzu eta dagoeneko hamazazpi kritika irakurri dituzu, hiru trailer ikusi eta lau lagunei galdetu diezu. Azkenean, sarrerarik gabe geratuko zara. Bizitzan aukera errazagoak izango dituzu: joan ala ez joan. Ez pentsatu gehiegi. Joan. Edo ez. Baina, mesedez, erabaki zerbait.

Cancer: ekainaren 22tik uztailaren 22ra.

Cancer, badakigu gaitasun handikoa zarela, baina ezin da dena batera egin. Produktibitatearen gailurrera iristeko asmoa duzu. Lanak aurreratu, ariketa fisikoaegin, etxea txukundu eta bizitza soziala berreskuratu nahi dituzu, ahal dela dena aste berean. Urria aukera ona izango da zure beharrak behar bezala ordenatzeko.

Leo: uztailaren 23tik abuztuaren 22ra.

Ikasturte hasierak gainezka egin dizu, Leo, eta iraila aldapa gorakoa izan da. Igotzen dena jaisten dela diote, eta urriak horretarako balioko dizu zuri. Gauzak pixkanaka kokatuko dira dagokien tokian eta lortuko duzu motxilari pisua kentzea.

Virgo: abuztuaren 23tik irailaren 22ra.

Armairua antolatu, egutegia eguneratu eta etxeko tiradera misteriotsu horri helduko diozu, barruan zer dagoen gogoratzen ez baduzu ere. Zure bizitzako beste atal batzuk ere ordenatu nahi dituzu. Arnasa hartu. Tiradera bihar ere hor egongo da.

Libra: irailaren 23tik urriaren 22ra.

Iraileko erritmoak hankaz gora jarri zaitu eta urrian lasaitasuna berreskuratu nahi duzu. Baina, jakina, lasaitasuna ere zure erara izango da edo ez da izango, ezta? Batzuetan, arratsalde aspergarri bat pasa beharra dago Eta ez da ezer gertatzen.

Escorpius: urriaren 23tik azaroaren 21era.

Batzuetan, zu ez zaren norbait zarela antzeztera behartuta sentitzen ari zara, Escorpius. Zarenaren erroa oinarri hartu behar zenuke eta sortu dituzun pertsonaiek jana izaten ez utzi. Familiako azken lau belaunaldiak koxkeroak badira, zergatik ari zara goierritarrez?

Sagitarius: azaroaren 22tik abenduaren 21era.

Urrian lan eskaintza berri bat helduko zaizu. Adi irakurri baldintzak eta funtzioak zein diren eta hartu egun parea lan aldaketa egiteko prest zauden hausnartzeko. Kartek diote ezin diozula ezetzik esan, aise moldatuko zarela.

Capricornius: abenduaren 22tik urtarrilaren 19ra.

Gorputzak etenaldi bat eskatu dizu, Capricornius, baina ez koma egoeran sartzea. Hartu atsedena eta eman gorputzari eskatu dizun pausa, baina ez zaude heriotz arriskuan, bizitzen jarraitu dezakezu, lasai.

Zapaburius: otsailaren 29tik 31ra.

Auzoetako jaiak amaitu zaizkizu eta planik gabe gelditzearekin beldurtuta zaude, Zapaburius. Akaso, Donostiatik ateratzeko garaia heldu zaizu, inguruko bailaretan gora igeri aritzekoa.