Kapitolioko erasotzaileak Parte Zaharretik ibili dira
Kapitolioko erasoko protagonistak Eneko Goia alkatearekin elkartu dira Parte Zaharrean. (Argazkia: Unai Bayon) 
Pandemia dela eta, aurten ez da inauteririk ospatu Donostian, baina donostiarrek ez dute umorea galdu, eta batzuk mozorrotuta atera dira kalera. Beste urte batzuetan baino jende gutxiago mozorrotu da, baina egunak aurrera egin ahala, gero eta herritar gehiago animatu dira mozorroak jartzera. Parte Zaharrean, esaterako, Amerikako Estatu Batuetako Kapitolioa eraso zuten Donald Trumpen jarraitzaileak agertu dira, eta Ikatz kalea errepublikazale bihurtu dute. Gainera, Eneko Goia alkatearekin topo egin dute, eta elkarrekin argazki bat egin dute Parte Zaharrean.
Kapitolioko erasotzaileak Parte Zaharrean ibili dira tragoak hartzen. (Argazkia: Unai Bayon)
Kapitolikoez gain, Metroko langile talde bat ere agertu da Bulebarrean; dirudienez, atseden eguna izan dute gaur, eta Kontxako tuneletik atera dira. Marinel bat eta dantzari sevillar bat ere iritsi dira Donostiara. Era berean, hainbat nerabe talde ibili dira Donostiatik animaliaz jantzita.
Metroaren langileak Kontxako tuneletik atera dira, eta Bulebarretik ibili dira inauterietako larunbatean. (Argazkia: Beñat Parra)
Andaluziako turistak heldu dira Donostiara, oraingoan marinelekin batera. (Argazkia: Beñat Parra)
Nerabe talde asko mozorrotu dira arratsaldean Donostian. (Argazkia: Beñat Parra)
