Bruselakoak ez dira txikitan ibili, argi ikusten dituzten kasuetan ibiltzen ez diren bezala, ur hotzez betetako kupel batekin, Rajoy jauna blai utzi dutenean, ia esnatzen den, baduela garaia. Bere aurrekontuek ez dutela ezertarako balio. Estatuaren defizita ez dela berak espero duen neurrian jaitsiko. Murrizketa gehiago behar direla, eta noraino eta noiz arte? Aurten beste 600.0000 lanpostu galduko direla estatuan eta ekonomiak berriro atzerakada bat egingo duela. Berri txarrak Euskalerriarentzat, ikusiz Espainiaren eta Frantziaren menpean gaudela eta Frantzian ere hankaz gora dabiltzala…
Eta dauzkagun arazoekin ez balitzake nahikoa, ustelkeriaren pipia azaltzen ari zaigu , Estatuaren burutik hasi eta oinen azkazaletaraino… Erregea batetik, eta Iñaki bestetik, eta Alderdi politikoen burukideak, bata besteak elkar salatzen… Diru publikoak dantzan, eta jendea nazkatua noski, baino baita ere hainbeste zikinkeriekin nolabait disfrutatzen… Dudarik gabe, denok gaztatik gabiltza.
Eta dudarik gabe ere gaur eguneko Estatu Espainolaren kontzeptua bera, usteldu da, anakronikoa bihurtuz. Ez du konponketarik. Kaleko jendearen iritzia, gauzak ezin dutela dabiltzan bezala segi. Hemen zerbait gertatuko beharko dela. Iraultza edo erreforma, edo auskalo zer, edozein aukerak ez duela kontuan hartu litekeen alternatibarik eskaintzen. Monarkia usteldu batetik hain usteldua izanen den errepublika batera jotzea ? Alderdi politikoen eta politikarien joko legeak aldatzea?
Jendea aspertua dago, alderdiekin eta politikariekin, alproja elkarte batzuen itxura hartzen ari omen direlako… Espainiako Konstituzioaren aldatzea ere aipatzen da. Zer aldaketa eta zertarako eta zer suposatu lezake Euskalerriarentzat, hortaz deusik ez. Eta guk zer? Horra hor, une honetan galdera nagusia.
36an bezala, gurekin, gure interesekin zer ikusirik ez duen kristo batean gure burua berriro sartua aurkitzea? Zer egin? Gertatuko direnei isilean begiratu edo eztabaidetan parte hartu, Espainiako Estatu mota berriak gure eskubide eta ahaltasunak behar diren neurri minimoetara zabalduko dituen esperoan? Edo eta- gauza garen neurrian- Espainiako estatutik alde egin eta gurea sortu?
Rajoyk zionez, Europatik eta eurotik kanpo. Suitzak bezala. Behin eta berriro Ibarretxe lehendakariak aipatzen zuen bezala, gu gizarte moderno bat gara. Euskalerria Kantauriko Suitza batean bihurtzeko kapazak. Punta puntako teknologiak, esportatzeko kemenak, turismoa. Eta paradisu fiskal bat, helvetiarren estiloan. Azken posibilitate hori, Ibarretxek ez zuen aipatu, baina ziur nago pentsatu zuela. Ordua etorri zaigu, denok, Euskalerriak exijitzen dituen alternatiba guztietan serioki pentsatzeko.
