‘Udalitxia’, ez udaletxea
Urtea hasi besterik ez da egin… eta eskubide sozial, zibil eta politikoen urraketarekin hasten da. Ez gara harritzen, aspalditik baitator, baina jarrera batzuk onartezinak iruditzen zaizkigu eta salatu egin behar ditugu.
Alde batetik, Piztu Donostiak Eneko Goiak entzungo gaitu! kanpaina jarri dugu martxan, eta beste hamasei eragile sozial, sindikal eta politikok bat egin dute, udalaren «bunkerizazioak» eragin dituen aldebakarreko aldaketak salatzeko. Ez bakarrik herritarrengandik aldenduz, baita haien eskubideak murriztuz ere. Adibidez, aurkeztu daitezkeen mozioen kopurua mugatu dute, eta, beraz, indar politikoek ezin izango dituzte aurkeztu herritarrek eta eragileek egin nahi dituzten kontrol mozioak. Era berean, oztopoak jartzen dira udaletxera sartzeko edo osoko bilkuretara joateko. Kasu barregarria gerta daiteke, adibidez, herritar batek abenduan Gabonetako argiei buruzko galdera bat aurkeztea eta martxoko osoko bilkurarako deitzea.
Udal Gobernuak proposatzen digun hiri ereduan murgilduta gaude: elitismoa, turistifikazioa, gentrifikazioa, espekulazio eredua, etxebizitzaren negozioa, zerbitzu publikoen pribatizazioa, abiadura handiko trena, metroa eta zigorren hazkundea baititu ezaugarri, gobernantza errepresiboaren ereduarekin.
Errepresioez ari garela, Urkulluri entzun diogu irrati batean esanez Ertzaintzaren eta Udaltzaingoaren neurriak erabat neurtuak izaten ari direla. Lehendakariari «neurtua» iruditzen zaionak beldurtu egiten gaitu, eta bi aukera uzten dizkigu: edo errealitatetik urrun dago, edo ez ditu ikusi joan den asteburuan Donostiako Parte Zaharrean grabatutako dozenaka bideoak, modu baketsuan bilduta zeuden, etxeratze agindua eman aurretik eta segurtasun neurriak gordetzen ari ziren gazteen aurkako karga neurrigabea eta gehiegizkoa. Horregatik, Piztu Donostiak bat egiten du Alde Zaharreko Gazte Asanbladaren mobilizazioekin.
Eta esan bezala, urte osoa geratzen zaigu aurretik…
