Xabier Vazquez, realzalea.
Futbologia hau irakurtzen baduzu zoriontsu izatea eskura eskura duzu, realzale maite horrek. Email batean idatz ezazu “Xabier Vazquez Eizmendiri Realeko partida guztietarako bidaia eta sarrera ORAIN!” eta bidaliozu Realari eta beste 10 laguni futbologia honen kopia bat atxikiturik eta nire kontu korronte zenbakia. Hala egiten baduzu zoriontsua izango zara denboraldi honetan eta hurrengoan zehar.
Ados, Xabier Vazquez bera izatea kanpaina hau abian jarri duena ez da oso itxurosoa. Baina ez da gauza pertsonal bat, Realaren hobe beharrez diot. Azken hilabeteetan Australian bizi den ingeles bat oso ospetsu bihurtu da sare sozialetan. 2B edo 3 mailako talde ingeles baten zalea da eta bere betiko taldea Kopako finalera iritsi da, baina bera Australian ezkondu zen emaztearekin. Emazte australiarrak Kopako partida ikustera joateko baimena eman diezaion abiarazi du kanpaina hori. «Milioi bat gustatzen zait lortzen baditut Facebooken nire emazteak Bradforden partida ikustera joaten utziko didala esan dit» edo antzeko zer edo zer dioen kartel batekin azaltzen da argazkian. Ia-ia denak lortu ditu, hau irakurtzen duzunerako ez baditu pasa. Oso polita da, baina berekoi samarra ere bai. Nirea ez da hori. Esan bezala, Realaren hobe beharrez da.
Aurtengo denboraldian Realak etxetik kanpo oso gutxitan irabazi du. Gogoan dudala Malaga, Valentzia eta Zaragoza. Lehenengoan eta azkenekoan ni neu ikusle. Bi bidaia egin eta biak irabazi (emaitza bera 1-2). Beste futbologo eta sasijakintsu batzuek Europara joan ahal izateko gako garrantzitsu pila emango dizkizute: Montanierren planteamenduak, Illarramendiren jokoa, Velak arerioei eragindako falta eta txartelak, Prietok erdialdean taldeari ematen dion patxara… Beno ez dizuet esango ahuntzaren gauerdiko eztula direnik, baina… gure artean… gakoa gakoa honakoa da: ni bertan egotea. Eta horretarako garrantzitsua da denok bat egin dezagun. Realak bere aldetik jarrita eta beste zale guztion artean bada dirua eta baliabideak pilatuta. Ni Bilbo, Iruñea eta Vallekasera joanda, agian zu zeu izango zara datorren denboraldian Liverpool edo Atenasera joango dena. Baina horretarako badakizu zer egin.
