Donostiarrak soilik Gipuzkoan barna ibili ahalko dira asteazkenetik aurrera
Hiriak 100.000 biztanleko 500 kasuen langa gaindituz gero, neurriak zorrotzagoak izango dira: soilik udalerritik mugitu ahalko da, eta tabernak itxiko dituzte. Bitartean, tabernek zabalik jarraituko dute, eta eskola kirola partzialki itzuliko da.
(Argazkia: Beñat Parra) 
LABIko Aholku Batzordeak bilera egin du gaur goizean, eta Gotzone Sagardui Osasun sailburuak hainbat neurri iragarri ditu, Euskal Autonomia Erkidegoan izandako kutsatzea baretzeko asmoarekin: ezingo da probintziatik atera. Era berean, udalerri batek 100.000 biztanleko 500 kasuen langa gainditzen badu, ezingo da udalerri horretatik atera, toki horretako tabernak itxiko dituzte eta kirol jarduerak etengo dituzte. Donostian, une honetan, 100.000 biztanleko kutsatze kopurua 265,91koa da; bestela esanda, donostiarrak Gipuzkoatik modu librean mugitu ahalko dira, eta tabernek zabalik jarraituko dute, baina 20:00etan itxi beharko dute, orain arte bezala. Aipatutako neurriak asteazkenean, urtarrilaren 13an, 0:00etan, sartuko dira indarrean, dekretu bidez.
Era berean, egun horretatik aurrera, eskola kirola partzialki itzuliko da, sei pertsonako taldeetan, burbuilak mantenduz, eta ezingo da aldagelarik erabili. Eusko Jaurlaritzak azaroaren 6ko dekretuan bertan behera utzi zuen, eta geroztik Bultza Kirola plataformak eta Sos Eskola Kirola mugimenduak hainbat hilabete daramatzate eskola kirolaren itzulera eskatzen. Larunbatean manifestazioa egin zuten kirola ezinbesteko jardueratzat jo dadin eskatzeko. Dantza talde ez profesionalek ere entseguetara itzuli ahalko dute, baina musika entsegu eta emanaldi ez profesionalek debekatuta jarraituko dute. Gainera, joko eta apustu etxeak ireki ahalko dira ostalaritzari ezarritako neurri berberekin, betiere udalerria 500 kasuen langaren azpitik badago.
Aldiz, merkataritza-guneetan eta saltokietan mugak izango dira: 150 metro koadro baino gehiago dutenetan, edukiera %40ra murriztuko da; azalera hori baino txikiagoa dutenen kasuetan, %60ra.
Etxeratze aginduak 22:00etan izaten jarraituko du.
