Hiriko emisio gutxiko eremuak sortzeko plan bat egingo du udalak
Airearen kalitatea neurtzeko estazioa. 
Klima 2050 Planean jasotako helburuen barruan, Airearen Kalitaterako Klima Plana egingo du Donostiako Udalak. Plan horrek, besteak beste, udalerrian emisio gutxiko eremuak sortzea aurreikusten du. Tokiko Gobernu Batzordeak onartuko du plana, 40.000 euroko aurrekontua izango du, eta bederatzi hilabeteko epean ezarriko dute zer neurri zehatz hartuko diren.
“Plan hau Europar Batasunak, Espainiako Gobernuak eta Eusko Jaurlaritzak ezartzen dituzten lege-eskakizunen babesean egiten da. Ibilgailu motordunen zirkulazioa kudeatzeko tresna batez hornitzea ahalbidetuko du, emisio kutsatzaile gutxien dituztenak lehenetsiz eta Osasunaren Mundu Erakundearen gomendioen araberako airearen kalitateari eutsiz”, azaldu du Ekologia zinegotzi Marisol Garmendiak.
Planak isurketa gutxiko eremu batzuk ezarriko ditu udalaren mugetan 2023a baino lehen. Data hori Klima Aldaketari eta Trantsizio Energetikoari buruzko legeak ezartzen du epe gisara, eta oraindik izapidetze parlamentarioaren fasean dago. “Lege horren arabera, 50.000 biztanletik gorako udalerriek gas kutsagarrien isuriak arintzeko neurriak hartu beharko dituzte udalerrian, besteak beste, isurketa gutxiko gune horiek sortzea”, esan du Garmendiak.
Bestalde, Ekologia zinegotziak azpimarratu du erakunde publikoek “gutxiago kutsatzen duten eta energia garbiagoak dituzten ibilgailuen erabilera” sustatu behar dituztela. “Mugikortasun iraunkorreko politikak indartu behar ditugu, eta hiriko kutsadura neurtzeko sistemak hobetu”.
