Hodi baten hausturak urik gabe utzi ditu Txomiñeneko bizilagun batzuk
Txomiñeneko hodi baten hausturak urik gabe utzi ditu bizilagun batzuk. 
Atzo gauean kaleko hodi bat hautsi ondoren, Txomiñeneko bizilagun batzuk urik gabe geratu dira hainbat orduz. Wroclaw plazako 5. atariko bizilagunek ez dute ur hornidurarik izan atzoko 23:00etatik gaurko eguerdira arte. “Amenabarreko teknikari batek esan digunez, hodi baten pieza okerrak eragin du matxura. Dena dela, baliteke lurra behar bezala ez trinkotu izanaren ondorioetako bat izatea”, azaldu dio bizilagun batek hedabide honi.
Donostiako Udalak nabarmendu du matxuraren ardura Amenabar eraikuntza enpresarena dela, eta dagoeneko konponduta dagoela: “Egiten ari diren lanek lurren mugimendua eragin zuten, eta horrek ur hornidura kaltetu zuen. Kasu hauetan lanen arduraduna da arazoa konpondu behar duena”. Txomiñeneko lanak bukatzean, udala izango da obraren arduraduna. “Bitartean, enpresari dagokio sortzen diren arazoak konpontzea”.
Bizilagunek denbora daramate esaten auzoa ez dagoela behar bezala urbanizatuta. “Horren ondorioz, lurra hasieran baino 5 zentimetro baxuago dago orain, eta eraikinen fatxaden eta lurraren artean espazioa ireki da”, adierazi du bizilagun batek. Txomiñeneko lanak oraindik bukatu gabe daude, eta Obra Zuzendaritzak bukaera sinatu arte ez da udalaren eskumenekoa izango. “Horregatik, arazoak daude udaleko mantenu eta garbiketa sailekin. Dirudienez, garbiketa, iturriak eta argiztapena Amenabarren esku daude”.
Saguak
Abendua bukaeran, auzoan saguak azaldu zirela salatu zuten bizilagunek: “Bi arrazoirengatik dela uste dugu. Batetik, auzoko obrak behar bezala ez direlako egin, eta bestetik, zikinkeria metatu delako”. Hain zuzen ere, urte eta erdian kaleak garbitzeaz arduratzen den kamiorik ez da auzotik pasa.
Saguak azaldu dira Txomiñeneko kaleetan eta zenbait etxetan, eta bi arrazoirengatik dela uste dute auzotarrek: auzoko obrak “behar bezala” ez direlako egin eta “zikinkeria” metatu delako. Izan ere, Txomiñeneko lanak amaitu gabe daude oraindik.
